نگراں وزیراعلیٰ سندھ جسٹس (ر) مقبول باقر نے آئی جی پولیس سندھ اور ڈی جی رینجرز کے نام خط لکھ کر صوبے میں بڑھتے ہوئے جرائم پر تشویش کا اظہار کیا ہے۔
وزیراعلی سندھ جسٹس (ر) مقبول باقر نے آئی جی سندھ اور ڈی جی رینجز کے نام لکھے خط میں کہا ہے کہ سندھ کے بڑے شہروں سمیت دیہی علاقوں میں امن و امان کی صورتحال خراب ہے، صوبے میں بڑھتے جرائم میں حالیہ اضافہ کافی تشویشناک ہے۔
جسٹس(ر) مقبول باقر نے خط میں لکھا ہے کہ صوبے میں جرائم کی بڑھتی لہر کو روکنے کے لیے فوری اقدامات کیے جائیں، صوبے میں سنگین جرائم میں اضافہ خوش آئند نہیں ہے۔
وزیراعلیٰ سندھ کا کہنا ہے کہ کراچی میں اسٹریٹ کرائمز جیسی وارداتیں روزانہ بڑھتی جارہی ہیں، اخبارات اور الیکٹرانک میڈیا تمام جرائم کی مسلسل نشاندہی کررہا ہے، انتخابی امیدواروں پر حملے اور دن دیہاڑے اغوا کے واقعات کی بھی رپورٹس ہیں۔
انہوں نے اپنے خط میں کہا کہ معاشرے میں خواتین، بچوں اور بوڑھوں کو ان جرائم سے کافی نقصان اٹھانا پڑ رہا ہے، صحافیوں، وکلا، ڈاکٹرز، تاجرز اور دیگر پیشہ ور افراد کو جان و مال کے خطرات لاحق ہیں۔
وزیراعلیٰ جسٹس (ر) مقبول باقر نے سوال اٹھایا ہے کہ صوبے میں بگڑتی صورتحال کے باوجود قانون نافذ کرنے والے ادارے بدستور خاموش کیوں ہیں؟ آئین میں درج شہریوں کے بنیادی حقوق کے تحفظ کو ہر صورت یقینی بنایا جائے۔
