انتخابی نشانات کی تبدیلیاں: الیکشن کمیشن نے انتخابات میں تاخیر کے خدشے کا اظہار کر دیا

الیکشن کمیشن آف پاکستان نے کہا ہے کہ اگر انتخابی نشانات کی تبدیلی کا عمل جاری رہا تو الیکشن میں تاخیر کا خدشہ ہے۔

ترجمان الیکشن کمیشن نے کہا ہے کہ انتخابی نشانات کی تبدیلی کی صورت میں ہمیں بیلٹ پیپرز دوبارہ پرنٹ کرانا پڑیں گے اور وقت پہلے ہی محدود ہے۔

ترجمان نے کہا ہے کہ الیکشن کمیشن نے اسپیشل کاغذ بیلٹ پیپرز کے لیے مہیا کیا ہے وہ بھی ضائع ہو جائے گا۔

ترجمان الیکشن کمیشن کے مطابق تینوں پرنٹنگ کارپویشنز کو بیلٹ پیپرز چھاپنے کا آرڈر دے چکے ہیں اور چھپائی کا کام بھی شروع ہو گیا ہے۔

انہوں نے کہاکہ اس بار 26 کروڑ بیلٹ پیپرز چھپوائے جا رہے ہیں، انتخابی نشانات تبدیل کرنے کا سلسلہ نہ رکا تو ایسے حلقوں میں الیکشن ملتوی کرنا پڑیں گے۔

واضح رہے کہ پی ٹی آئی سے بلے کا انتخابی نشان واپس لینے کے بعد الیکشن کمیشن نے ان کے آزاد ہو جانے والے امیدواروں کو مختلف انتخابی نشانات الاٹ کیے ہیں۔

پی ٹی آئی کا اعتراض ہے ان کے امیدواروں کو عجیب و غریب انتخابی نشانات الاٹ کیے گئے ہیں، اور اسی کی بنیاد پر کچھ لوگوں نے نئے نشانات کے لیے عدالت سے بھی رجوع کیا ہے۔