سابق وزیراعلیٰ پنجاب و صدر پاکستان تحریک انصاف چودھری پرویزالہٰی نے کہا ہے کہ اب حکومت کے دن گنے جاچکے ہیں کیوں کہ عمران خان مظلوموں کی آواز ہیں جن کی قیادت میں عوامی طاقت کو روکنا اس نا اہل ٹولہ کے بس کی بات نہیں۔
سینئر وکلاء کے وفد سے بات چیت کرتے ہوئے چودھری پرویزالہٰی نے کہا کہ پنجاب میں آئینی اور قانونی حقوق کو کچلنے کے لیے پولیس کا بدترین استعمال کیا جارہا ہے جو پی ٹی آئی کے رہنماؤں اور کارکنوں کی گاڑیاں توڑ کر گلوبٹ کا کردار اپنائے ہوئے ہے۔
چیف جسٹس پنجاب میں لاقانونیت کا نوٹس لیں
سابق وزیراعلیٰ پنجاب کا کہنا تھا کہ حکمران اتحاد انتخابات سے خوفزدہ ہے اور پنجاب کی نگران حکومت بدترین فسطائیت پراتر آئی ہے جس سے اس کا مکروہ چہرہ بے نقاب ہوگیا ہے۔
انھوں نے چیف جسٹس پاکستان عمر عطا بندیال سے اپیل کی کہ وہ پنجاب میں ہونے والی لاقانونیت کا نوٹس لیں۔
چودھری پرویزالہٰی نے پی ٹی آئی رہنماؤں اور کارکنوں پرآنسو گیس او لاٹھی چارج کے استعمال کی مذمت کرتے ہوئے کہا کہ شیڈول آنے کے بعد بھی انتخابی ریلی کی اجازت نہ دینا مضحکہ خیز ہے۔
سابق وزیراعلیٰ پنجاب پرویزالہٰی سے ملاقات کرنے والے وکلاء کے وفد میں طاہر نصراللہ وڑائچ، ممبر پاکستان بار کونسل عامر سعید راں، سابق سیکرٹری لاہور ہائیکورٹ بار، ثاقب اکرم گوندل، نواز ورک اور خواجہ عمیض شامل تھے۔
