بھارت کے یوم جمہوریہ پر فرینکفرٹ میں کشمیری اور سکھ کمیونٹی کا احتجاجی مظاہرہ

بھارت کے یوم جمہوریہ کے موقع پر جرمنی کے شہر فرینکفرٹ میں مقیم کشمیری اور سکھ کمیونٹی کے ارکان نے بھارتی قونصلیٹ کے سامنے احتجاجی مظاہرہ کیا۔ پاک – ای یو فرینڈ شپ فورم کے صدر عنصر بٹ نے مظاہرے کی قیادت کی۔

شرکا نے ہاتھوں میں بینرز اور پلے کارڈ بھی اٹھا رکھے تھے جن پر بھارت کی جانب سے مختلف اقلیتوں پر روا رکھے جانے والے مظالم بارے احتجاجی نعرے درج تھے۔ مقررین نے خطاب کرتے ہوئے کہا کہ دنیا کی سب سے بڑی جمہوریت ہونے کا دعویدار بھارت نہ صرف مقبوضہ کشمیر میں طویل عرصے سے ظلم و ستم کی آگ سلگا رہا ہے بلکہ بھارت میں مقیم اقلیتوں کے حقوق کی پامالی کا بھی مرتکب ہو رہا ہے۔

بھارت اپنے مذموم مقاصد کے حصول کے لیے دوسرے ممالک میں بھی سرحد پار دہشتگردی کی کاروائیوں میں بھی ملوث ہے۔ انہوں نے کہا کہ بھارت میں نام نہاد جمہوریت کے لبادے میں لپٹی مودی حکومت دراصل ہندتوا کے نظریے کے فروغ و ترویج کے لیے بنیادی انسانی حقوق کی سنگین پامالی کی مرتکب ہو رہی ہے اور اقلیتوں کی عباد گاہیں حتیٰ کہ ان کے جان و مال بھی انتہا پسند جنونی جتھوں کے ہاتھوں غیر محفوظ ہیں۔

مظاہرے کے شرکاء نے عالمی برادری پر زور دیا کہ وہ انسانی حقوق کی سنیگن پامالیوں پر بھارت کو کٹہرے میں لانے اور ان مظالم کا سدباب کرنے میں اپنا کردار ادا کرے۔