انٹرنیشنل کرکٹ کونسل میں سری لنکا کی رکنیت بحال

انٹرنیشنل کرکٹ کونسل (آئی سی سی) نے سری لنکا کرکٹ کی معطلی ختم کر دی ہے۔

انٹرنیشنل کرکٹ کونسل نے گزشتہ برس نومبر میں بطور ممبر آئی سی سی قوانین کی خلاف ورزی کرنے پر سری لنکا کرکٹ کو معطل کیا تھا۔

اب آئی سی سی نے معطلی کے بعد صورت حال کا جائزہ لیتے ہوئے پابندی ہٹا دی ہے۔

سری لنکا کرکٹ نے انٹرنیشنل کرکٹ کونسل کو یقین دہانی کرائی ہے کہ اب معاملات میں حکومتی مداخلت نہیں ہوگی۔

واضح رہے بھارت میں کھیلے گئے آئی سی سی کرکٹ مینز ورلڈ کپ میں بھارت کے ہاتھوں سری لنکا کی 302 رنز کی شرمناک شکست کے بعد وزیر کھیل روشن رانا سنگھے نے سری لنکن کرکٹ بورڈ حکام سے استعفوں کا مطالبہ کیا تھا۔ بورڈ سیکریٹری موہن ڈی سلوا کے استعفیٰ کے اگلے روز ہی وزیر کھیل نے کرکٹ بورڈ کو برطرف کر دیا تھا۔

وزیر کھیل روشن رانا سنگھے نے سری لنکا کرکٹ کے لیے عبوری کمیٹی تشکیل دی تھی۔ اور 1996 کا ورلڈ کپ جیتنے والے کپتان ارجنا رانا ٹنگا کو نئے عبوری بورڈ کا چیئرمین مقرر کیا گیا تھا۔

تاہم اس فیصلے کو عدالت میں چیلنج کیا گیا تو عدالت نے عبوری کمیٹی کے قیام پر عملدرآمد روک دیا تھا۔