بلوچستان کے علاقے مچھ اور کولپور میں سیکیورٹی فورسز نے کارروائی کی ہے کہ اور 3 خود کش حملہ آوروں سمیت 9 دہشتگردوں کو ہلاک کر دیا ہے جبکہ 3 دہشتگرد زخمی ہو گئے ہیں۔
پاک فوج کے شعبہ تعلقات عامہ (آئی ایس پی آر) کے مطابق دہشتگردوں نے مچھ اور کولپور کمپلیکسز پر خود کش بمباروں سمیت حملہ کیا جس کا سیکیورٹی فورسز نے موثر جواب دیتے ہوئے حملہ پسپا کر دیا۔
مزید پڑھیں
آئی ایس پی آر نے بتایا کہ علاقے میں سیکیورٹی فورسز کو فوری طور پر متحرک کردیا گیا جو آپریشن کو جاری رکھے ہوئے ہیں۔
آئی ایس پی آر کے مطابق دہشتگردوں کے خلاف لڑتے ہوئے قانون نافذ کرنے والے اداروں کے 4 بہادر جوان بھی شہید ہو گئے ہیں جبکہ 2 معصوم شہریوں نے بھی شہادت کو گلے لگا لیا۔
ترجمان کے مطابق قانون نافذ کرنے والے اداروں کا موثر جواب دہشت گردی کے خلاف جنگ میں ان کے بے لوث عزم کا ثبوت ہے۔
آئی ایس پی آر نے کہاکہ پاکستان کی سیکیورٹی فورسز ملک میں امن و استحکام کو یقینی بنانے کے لیے قانون نافذ کرنے والے دیگر اداروں کے ساتھ کندھے سے کندھا ملا کر کھڑی ہیں۔
واضح رہے کہ گزشتہ رات سیکیورٹی فورسز نے بی ایل اے کے دہشت گردوں کے حملے کو پسپا کر دیا تھا۔
دہشتگردوں کی جانب سے متعدد راکٹ فائر کیے گئے لیکن دہشت گرد سیکیورٹی فورسز کی طرف سے مؤثر جواب کے نتیجے میں بوکھلا کر پسپا ہو گئے تھے۔ اور اس دوران مچھ پولیس کا ایک اہلکار شہید ہوا تھا۔
