وائٹ ہاؤس کی پریس سیکریٹری کیرولین لیویٹ نے اپنے عہدے پر آخری روز اپنے دونوں کم سن بچوں کو وائٹ ہاؤس کے بریفنگ روم میں بلا لیا، جہاں انہوں نے بچوں کے ساتھ تصاویر بنوائیں اور خوشگوار لمحات گزارے۔
کیرولین لیویٹ جمعرات کو وائٹ ہاؤس پریس سیکریٹری کی حیثیت سے آخری روز فرائض انجام دے رہی تھیں، اس کے ساتھ ہی وائٹ ہاؤس میں ان کی تقریباً 20 ماہ پر محیط مدتِ ملازمت بھی اختتام پذیر ہوگئی۔
یہ بھی پڑھیں: وائٹ ہاؤس کی تاریخ کی کم عمر ترین ترجمان کیرولین لیویٹ کا عہدہ چھوڑنے کا اعلان، وجہ کیا بتائی؟
اپنے آخری انٹرویوز میں کیرولین لیویٹ نے عہدہ چھوڑنے کی وجہ بیان کرتے ہوئے کہا کہ ایک ماں کی ذمہ داریاں نبھانے کے ساتھ ملازمت کے سخت تقاضوں کو پورا کرنا اب ان کے لیے ممکن نہیں رہا تھا۔
Karoline Leavitt poses with her babies on her last day as White House Press Secretary.
She is choosing to step down to prioritize motherhood. Beautiful. pic.twitter.com/UE9YJZYsDn
— Anna Lulis (@annamlulis) August 27, 2026
انہوں نے کہا کہ کام کرنے والی ماں کے لیے ہر دن ایک چیلنج ہوتا ہے اور اس دوران بہت سی قربانیاں دینا پڑتی ہیں۔
ان کے بقول، دو انتہائی کم عمر بچوں کی پرورش کے لیے گھر پر جس قدر موجودگی اور توجہ درکار ہے، وہ اپنی مصروف ملازمت کے باعث بچوں کو نہیں دے پا رہی تھیں۔
لیویٹ نے کہا کہ ان کی دوسری بیٹی کی پیدائش نے انہیں یہ احساس دلایا کہ گھر میں 2 ایسے ننھے بچے ہیں جنہیں اپنی ماں کی مستقل توجہ اور موجودگی کی ضرورت ہے اور وہ اس کے مستحق بھی ہیں۔
مزید پڑھیں: ڈونلڈ ٹرمپ کا بڑا ’اے آئی‘ مذاق، خود کیرولین لیویٹ کی خالی نشست پر بطور ’بہترین پریس سیکریٹری‘ پیش کردیا
ان کا کہنا تھا کہ ان کے بچے ابھی بہت چھوٹے ہیں اور یہ عمر ان کی شخصیت اور زندگی پر گہرے اثرات مرتب کرتی ہے۔
’بچوں کے ساتھ گزارا جانے والا یہ قیمتی وقت دوبارہ واپس نہیں آتا، اسی لیے انہوں نے اپنے خاندان کو ترجیح دینے کا فیصلہ کیا۔‘
واضح رہے کہ 29 سالہ کیرولین لیویٹ امریکی تاریخ کی کم عمر ترین وائٹ ہاؤس پریس سیکریٹری ہیں، ان کے پہلے بیٹے کی عمر 2 سال جبکہ دوسری بیٹی کی عمر صرف 3 ماہ ہے۔
