متحدہ عرب امارات کے وزیر خارجہ شیخ عبداللہ بن زاید آل نہیان نے کہا ہے کہ غزہ کی تعمیر نو کے لیے 5 ملین ڈالر کی رقم مختص کی گئی ہے۔
متحدہ عرب امارات کے سرکاری میڈیا کے مطابق متحدہ عرب امارات کے وزیر خارجہ کی جانب سے جاری بیان میں کہا گیا ہے کہ اماراتی صدر شیخ محمد بن زاید آل نہیان کی ہدایات پرعمل کرتے ہوئے غزہ میں فلاحی منصوبوں کے لیے 50 لاکھ ڈالر مہیا کیے جائیں گے۔
مزید پڑھیں
امارات الیوم اخبار کے مطابق اقوام متحدہ کی فلسطینی پناہ گزین ایجنسی (انروا) چیف کوآرڈینیٹر سیگرڈ کاگ کی غزہ میں تعمیر نو کی کوششوں کو سراہتے ہوئے فلاحی منصوبے میں متحدہ عرب امارات کی جانب سے 50 لاکھ ڈالر کا تعاون کیا جائے گا۔
وزیر خارجہ نے کہا کہ اقوام متحدہ کی جانب سے غزہ پٹی کے لیے جو انسانی بنیادوں پر کام کیا جارہا ہے امارات اس کی حمایت جاری رکھے گا تاکہ غزہ پٹی کے مصیبت زدگان کی مشکلات میں کمی ہوسکے۔
واضح رہے کہ 7 اکتوبر سے غزہ میں جاری اسرائیلی بربریت کے نتیجے میں اب تک 27 ہزار سے زائد فلسطینی شہید اور 65 ہزار سے زائد زخمی ہو چکے ہیں۔
اقوامِ متحدہ کے مطابق اسرائیلی حملوں کے باعث غزہ ناقابلِ رہائش ہو چکا ہے اور غزہ کی 80 فیصد سے زائد آبادی نقل مکانی کر چکی ہے۔
