بھارتی سنیما کی سب سے زیادہ کمائی کرنے والی فلم ’دنگل‘ کی چائلڈ اداکارہ سوہانی بھٹناگر 19 سال کی عمر میں انتقال کرگئیں۔ سوہانی نے سپر اسٹار عامر خان کی فلم ’دنگل‘ میں بھارتی ریسلر ببیتا پھوگاٹ کے بچپن کا کردار ادا کیا تھا۔
مزید پڑھیں
کم سنی میں دنیا سے رخصت ہونے والی اداکارہ کی ناگہانی موت کا جب عامر خان کو علم ہوا تو انہوں نے بھی سوہانی کے انتقال پر آنکھوں میں آنسو لیے شدید دکھ کا اظہار کیا۔ عامرخان کی پروڈکشن ٹیم عامرخان پروڈکشن نے سوشل میڈیا پر سوہانی کے انتقال پر دکھ کا اظہار کیا ہے۔
پوسٹ میں لکھا گیا ہے کہ سوہانی کے انتقال کی خبر سن کر بہت بڑا صدمہ ہوا، ہم سوہانی کی والدہ پوجاجی اور ان کے پورے خاندان سے اظہار تعزیت کرتے ہیں، بہت باصلاحیت نوجوان لڑکی، ٹیم کی کھلاڑی، ان کے بغیر ’دنگل‘ اتنی عظیم نہیں بن سکتی تھی۔ سوہانی، تم ہمیشہ ہمارے دلوں میں ستارے کی طرح زندہ رہوگی، تمہاری روح کو سکون ملے۔
بھارتی میڈیا رپورٹس کے مطابق سوہانی کی موت ادویات کے مضر اثرات کے باعث ہوئی ہے۔ سوہانی کا حال ہی میں حادثہ ہوا تھا اور وہ اس کے علاج کے لیے ادویات لے رہی تھیں۔ کہا جا رہا ہے کہ ادویات کے مضر اثرات کی وجہ سے سوہانی کے جسم میں پانی کی مقدار بڑھنے لگی اور اس کی موت واقع ہوگئی۔
