پاکستان میں ایک ہفتے کے دوران گرفتار بجلی چوروں سے کتنا جرمانہ وصول ہوا؟

ملک بھر میں بجلی چوری کے خلاف کریک ڈاؤن کا سلسلہ جاری ہے، حکومتی فیصلے کے پیشِ نظر مؤثر کارروائیوں کے ثمرات نظر آنے لگے، گزشتہ ہفتے ملک بھر سے 2 ارب روپے سے زائد رقم وصول کی گئی اور 106 افراد کو گرفتار کیا گیا۔

تفصیلات کے مطابق، 11 سے 18 فروری تک اسلام آباد، لاہور، فیصل آباد، گوجرانولہ اور ملتان سے مجموعی طور پر 1.211 ارب روپے وصول کیے گئے جبکہ اسلام آباد، لاہور، فیصل آباد اور ملتان سے 57 افراد کو گرفتار کیا گیا۔

پشاور سے 0.301 ارب روپے وصول اور 26 افراد گرفتار جبکہ نئے ضم شدہ اضلاع سے 0.022 ارب روپے وصول کیے جا چکے ہیں۔

حیدرآباد اور سکھر سے مجموعی طور پر 0.485 ارب روپے وصول کیے جا چکے ہیں جبکہ سکھر سے 23 افراد گرفتار کیے جا چکے ہیں۔ کوئٹہ سے 0.077 ارب روپے وصول کیے گئے ہیں۔

یکم ستمبر سے اب تک کے اعداد و شمار کے مطابق، 44730 افراد گرفتار اور 75.166 ارب روپے وصول کیے جا چکے ہیں۔ متعلقہ حکومتی ادارے بجلی چوری کے خلاف کریک ڈاؤن کا سلسلہ جاری رکھنے کے لئے پرعزم ہیں۔