میر مرتضیٰ بھٹو قتل کیس: ملزمان کی عدالتی حاضری سے استثنیٰ کی درخواست مسترد

میر مرتضیٰ بھٹو قتل کیس میں ملزمان کی بریت کے خلاف اپیلوں پر سماعت سندھ ہائیکورٹ کے جسٹس نعمت اللہ پھلپوٹو نے کی، مقدمے میں نامزد چیئرمین نیکٹا رائےطاہراور دیگرملزمان عدالت میں پیش ہوئے۔

عدم پیشی پر عدالت نے ملزمان غلام مصطفیٰ، گلزاراحمد، ظفراحمد، اصغرمیمن کے قابل ضمانت وارنٹ گرفتاری جاری کردیے۔

عدالت نے سابق پولیس افسر واجد درانی سمیت دیگر ملزمان کو حاضری سے استثنیٰ دینے سے بھی انکار کردیا، جسٹس نعمت اللہ پھلپوٹو بولے؛ 2010 سے زیر سماعت اپیلیں جلد نمٹانا چاہتے ہیں۔

سابق پولیس چیف شاہد حیات مرحوم کے بھائی کی جانب سے اپیل کی پیروی کے لیے دائر درخواست منظور کرلی، وکلاء کی جانب سے عدالت کو آگاہ کیا گیا کہ کیس میں نامزد شاہدحیات، شبیراحمدقائمخانی، آغامحمدجمیل اور مسعودشریف کاانتقال ہوچکا ہے۔

جس پر عدالت نے متعلقہ ایس ایچ اوز کو ملزمان کےانتقال کی تصدیقی رپورٹ پیش کرنےکاحکم دیدیا، عدالت کو بتایا گیا کہ سپریم کورٹ کی جانب سے الیکشن کمیشن کے تفویض کردہ اسائنمنٹ کے باعث سابق پولیس افسر شعیب سڈل عدالت میں پیش نہیں ہوسکے۔

عدالت نے آئندہ سماعت پرپیش رفت رپورٹ طلب کرتے ہوئے سماعت 22 اپریل تک ملتوی کردی، واضح رہے کہ سندھ ہائیکورٹ میں اپیلیں سرکار اور مرتضیٰ بھٹو کے ملازم نور محمد نے دائر کررکھی ہیں۔