متحدہ قومی موومنٹ پاکستان کے مرکزی رہنما مصطفیٰ کمال کی رابطہ کمیٹی کے اجلاس میں کی گئی گفتگو سامنے آ گئی ہے۔
سوشل میڈیا پر گردش کرنے والی مبینہ آڈیو میں سنا جا سکتا ہے کہ مصطفیٰ کمال یہ کہہ رہے کہ مسلم لیگ ن اور پیپلزپارٹی کو ہماری ضرورت نہیں، حکومت بنانے کے لیے ان کے نمبر پورے ہیں۔
PMLN’s delegation told us MQM’s mandate is 100% fake, mustsfa kamal says pic.twitter.com/W5OdXzDwsO
— Murtaza Ali Shah (@MurtazaViews) February 27, 2024
مصطفیٰ کمال نے کہاکہ گزشتہ ہفتے مسلم لیگ ن کے ساتھ ہماری میٹنگ تھی، جب ہم وہاں پر گئے تو ایسے لگا کہ ان کو ہماری ضرورت ہی نہیں۔
مصطفیٰ کمال مزید کہتے ہیں کہ مسلم لیگ ن کے مطابق پیپلزپارٹی یہ کہہ رہی ہے کہ ایم کیو ایم کا 100 فیصد مینڈیٹ جعلی ہے۔ ہمیں حکومت میں ان کی ضرورت نہیں ہے۔
’کل کوئی ہماری بات نہ مانے تو معلوم ہونا چاہیے کہ اصل وجہ کیا ہے‘
ایم کیو ایم رہنما رابطہ کمیٹی کو مخاطب کرتے ہوئے کہتے ہیں کہ کل کوئی اگر ہماری بات نہیں سنتا تو ہمیں معلوم ہونا چاہیے کہ حکومت بنانے والی جماعتوں کو ہماری ضرورت ہی نہیں۔
واضح رہے کہ 8 فروری کو ملک میں ہونے والے عام انتخابات کے بعد پاکستان مسلم لیگ ن، پاکستان پیپلزپارٹی، ایم کیو ایم سمیت دیگر جماعتوں نے مل کر حکومت بنانے کا اعلان کیا تھا۔
مسلم لیگ ن اور پیپلزپارٹی کے درمیان حکومت سازی کا فارمولا طے پا گیا ہے مگر ایم کیو ایم کے ساتھ کسی نکتے پر اتفاق نہیں ہو سکا، حالانکہ مسلم لیگ ن اور ایم کیو ایم نے سیٹ ایڈجسٹمنٹ کے تحت انتخابات میں حصہ لیا تھا۔
اب متحدہ قومی موومنٹ کے پاور شیئرنگ فارمولے پر مسلم لیگ ن کے ساتھ مذاکرات جاری ہیں، تاہم پیپلزپارٹی کا موقف ہے کہ ہمیں ایم کیو ایم کو حکومت میں ساتھ نہیں بٹھانا چاہیے۔
