کیپٹن (ر) عبدالخالق اچکزئی اور غزالہ گولہ بلامقابلہ اسپیکر اور ڈپٹی اسپیکر بلوچستان اسمبلی منتخب

مسلم لیگ ن کے رہنما کیپٹن (ر) عبدالخالق اچکزئی بلامقابلہ اسپیکر اور پیپلزپارٹی کی رہنما غزالہ گولہ بلا مقابلہ ڈپٹی اسپیکر بلوچستان اسمبلی منتخب ہوگئی ہیں۔

بلوچستان اسمبلی میں مسلم لیگ ن کے نومنتخب رکن قومی اسمبلی کیپٹن ریٹائرڈ عبدالخالق اچکزئی بلوچستان اسمبلی میں اسپیکر کے امیدوار تھے، جن کے مقابلے میں کسی بھی رکن صوبائی اسمبلی نے کاغذات نامزدگی جمع نہیں کرائے ، نتیجتاً وہ بلامقابلہ اسپیکر بلوچستان اسمبلی منتخب ہوگئے ہیں۔

دوسری جانب پیپلزپارٹی کی رہنما غزالہ گولہ بلا مقابلہ ڈپٹی اسپیکر بلوچستان اسمبلی منتخب ہوگئی ہیں، ان کے مقابلے میں بھی کسی امیدوار نے کاغذات نامزدگی جمع نہیں کرائے۔

سیکریٹری بلوچستان اسمبلی کے مطابق سہ پہر 3 بجے کے اجلاس میں اسپیکر اور ڈپٹی اسپیکر کی کامیابی کا اعلان کیا جائے گا، اسپیکر اور ڈپٹی اسپیکر آج ہی حلف اٹھائیں گے۔

کوشش ہوگی کہ پورے ایوان کو ساتھ لے کر چلیں، عبدالخالق اچکزئی

بلامقابلہ منتخب ہونے والے اسپیکر بلوچستان اسمبلی کیپٹن (ر) عبدالخالق اچکزئی نے کہا ہے کہ تمام ارکان صوبائی اسمبلی نے ان پر اعتماد کیا جس پر وہ ان کے شکر گزار ہوں۔

عبدالخالق اچکزئی نے کہا ’کوشش ہوگی کہ پورے ایوان کو ساتھ لے کر منصفانہ طور پر چلا سکیں۔‘