اسٹیٹ بینک آف پاکستان نے کہا ہے کہ حکومت پاکستان کا جنوری 2024 تک قرض 64 ہزار 842 ارب روپے رہا۔
اسٹیٹ بینک نے اعدادوشمار جاری کرتے ہوئے بتایا کہ جنوری 2024 تک حکومت کا مقامی قرض 42 ہزار 626 ارب روپے رہا۔ جبکہ بیرونی قرض جنوری 2024 تک 22 ہزار 215 ارب روپے رہا۔
مزید پڑھیں
اسٹیٹ بینک کے مطابق دسمبر 2023 کے مقابلے جنوری 2024 میں حکومت کا قرض 346 ارب روپے کم ہے، جبکہ دسمبر کے مقابلے جنوری میں حکومت کا مقامی قرض 38 ارب روپے بڑھا۔
اسٹیٹ بینک نے بتایا کہ دسمبر کے مقابلے جنوری میں حکومت کا بیرونی قرض 384 ارب روپے کم ہوا ہے، جبکہ دسمبر کے مقابلے جنوری میں ڈالر کی قدر 2.3 روپے کم ہوئی۔
مرکزی بینک نے اعدادوشمار میں بتایا کہ جنوری 2023 کے مقابلے جنوری 2024 میں حکومت کا قرض 9820 ارب روپے زیادہ ہے، ایک سال میں حکومت کا مقامی قرض 8291 ارب روپے بڑھا۔ جبکہ بیرونی قرض میں 1528 ارب روپے اضافہ ہوا۔
اسٹیٹ بینک کے مطابق ایک سال میں ڈالر کی قدر 11.70 روپے زیادہ ہے۔
