گیلپ پاکستان کے ایگزٹ پول سروے میں انکشاف کیا گیا کہ 52 فیصد پاکستانیوں نے جسے ووٹ دیا اس کا فیصلہ خود کیا نہ کہ برادری کے کسی اجتماعی فیصلے کے پیش نظر یا علاقے کے بڑوں کے حکم پر اپنا حق رائے دہی استعمال کیا۔
مزید پڑھیں
ووٹروں کے 48 فیصد نے ووٹ دینے کی وجہ برادری کا فیصلہ قرار دی۔ جب کہ سروے میں 64 فیصد نے اپنی برادری کے بجائے باہر کے امیدوار کو ووٹ دینے کے بارے میں بتایا۔
امیدوار کی ترقیاتی کام کروانے کی صلاحیت نے کتنے ووٹ کھینچے؟
سروے کے مطابق برادری کے امیدوار کو ترجیح دینے والے ووٹرز 15 فیصد تھے جبکہ ووٹ دیتے وقت 21 فیصد نے امیدوار کے ترقیاتی کام کروانے کی صلاحیت کو اپنے ووٹ دینے کی اہم وجہ بتایا۔
تجدید عہد وفا؟
گیلپ سروے میں بتایا گیا ہے کہ 19 فیصد نے اپنی پارٹی سے وفاداری کی بنیاد پر جماعت کے منتخب امیدوار کو ووٹ دیا جب کہ 16 فیصد نے پولیس اور کچہری میں مدد لینے کے لیے امیدوار کو ووٹ دینے کی اہم وجہ قرار دیا۔
مذہبی اقدار و اخلاقیات کا خیال رکھنے والوں نے کتنے فیصد ووٹ لیے؟
کسی امیدوار میں مذہبی اقدار اور اخلاقیات کی حفاظت کا اہتمام دیکھ کر 14 فیصد افراد نے اسے ووٹ دے دیا جبکہ 13 فیصد نے ایسے تھے جنہوں نے امیدوار کی قانون سازی کی قابلیت کی قدر کرتے ہوئے اس کے نام پر ٹھپہ لگادیا۔
ایک فیصد ووٹرز نے کس چیز کو مدنظر رکھا؟
سروےمیں ایسے بھی نظر آئے جنہوں نے کہا کہ انہیں لگتا تھا کہ جس امیدوار کو انہوں نے ووٹ دیا وہ ان کے ناپسندیدہ امیدوار کو ہرا سکتا ہے۔ ایسے ووٹرز کی شرح ایک فیصد تھی۔ علاوہ ازیں 7 فیصد ووٹرز نے دیگر وجوہات بتائیں۔
