نیوزی لینڈ کے خلاف سیریز کے لیے ٹکٹس کی فروخت شروع، کونسا ٹکٹ کتنے کا ہے؟

پاکستان اور نیوزی لینڈ کے درمیان 5 ٹی۔20 میچوں کی سیریز کے ٹکٹس کی فروخت 29 مارچ سے شروع ہوگی جب کہ اس کے لیے ٹکٹوں کی قیمتوں کا تعین کر لیا گیا ہے۔

پاکستان کرکٹ بورڈ ( پی سی بی ) کی ویب سائٹ پر جاری تفصیلات میں بتایا گیا ہے کہ پاکستان اور نیوزی لینڈ کے درمیان 5 ٹی۔  20 میچوں کی سیریز 18، 20 اور 21 اپریل کو راولپنڈی اور 25 اور 27 اپریل کو لاہور میں کھیلی جائے گی۔ میچز شام ساڑھے 7 بجے شروع ہوں گے۔

پی سی بی کی جانب سے ویب سائٹ پر جاری تفصیل کے مطابق پہلے مرحلے میں آن لائن ٹکٹوں کی پری بکنگ جمعہ 29 مارچ  کو شام 5 بجے pcb.tcs.com.pk پر شروع ہوگی جب کہ پی سی بی کاؤنٹر پر فزیکل ٹکٹوں کی فروخت کا اعلان مناسب وقت پر کیا جائے گا۔

راولپنڈی کے پہلے مرحلے کے ٹکٹ کم از کم 500 روپے (پریمیم) اور زیادہ سے زیادہ 7500 روپے پر (وی وی آئی پی گیلری) کے لیے دستیاب ہوں گے۔ اس کے علاوہ ہاسپٹیلٹی نشستیں زیادہ سے زیادہ 15 ہزار روپے میں دستیاب ہوں گی سوائے پہلے ٹی ۔20 میچ کے، جہاں ہاسپٹیلٹی نشستیں 12 ہزار روپے میں دستیاب ہوں گی۔

پی سی بھی کے اعلان کے مطابق لاہور کے دوسرے مرحلے کے لیے عام نشستوں کی قیمت 300 روپے سے شروع ہو تی ہے جبکہ چوتھے ٹی ٹوئنٹی میچ کے لیے ٹکٹوں کی زیادہ سے زیادہ قیمت 6 ہزار روپے جبکہ پانچویں ٹی۔20 میچ کے لیے 7 ہزار روپے رکھی گئی ہے۔

اس کے علاوہ فار اینڈ بلڈنگ میں واقع ہاسپٹلٹی بکس لاہور کے لیے بھی نشستیں دستیاب ہوں گی۔ جمعرات 25 اپریل کو ہونے والے میچ کے لیے ۔ہاسپیٹیلٹی باکس 6 لاکھ روپے میں دستیاب ہوگا جبکہ ہفتہ 27 اپریل کے میچ کا باکس 7 لاکھ روپے میں دستیاب ہوگا۔