پاکستان میں تحریک انصاف نامی ایک جماعت تھی جو اب ختم ہو چکی، عظمیٰ بخاری

وزیر اطلاعات پنجاب عظمیٰ بخاری نے کہا ہے کہ معلوم نہیں خیبر پختونخوا میں کسی کو رمضان پیکج ملا یا نہیں لیکن صرف سوشل میڈیا پر منجن بیچا گیا۔

وزیر اطلاعات پنجاب نے اپنے ایک بیان میں وزیراعلیٰ خیبر پختونخوا علی امین گنڈاپور اور بیرسٹر سیف کے بیان پر ردعمل دیتے ہوئے کہا خیبر پختونخوا میں سینیٹ الیکشن آپ لوگوں کی ہٹ دھرمی کی وجہ سے نہیں ہوئے۔

انہوں نے کہا کہ الیکشن کمیشن نے ملک بھر میں ایک ہی دن سینیٹ الیکشن کروانے کی تیاریاں کی تھیں، پشاور ہائیکورٹ نے مخصوص نشستوں پر منتخب ارکان سے حلف لینے کا حکم دیا، اسپیکر خیبر پختونخوا اسمبلی قاسم سوری پارٹ ٹو بن گئے۔

لیگی رہنما نے کہا کہ علی امین گنڈاپور نے پہلے رمضان پیکج پر خود اپنی تصویریں شائع کروائیں، اب خود ہی اس پر برہمی کا اظہار کر رہے ہیں۔ ڈرامے بازیاں پی ٹی آئی پر ختم ہیں، معلوم نہیں خیبر پختونخوا میں کسی کو رمضان پیکیج ملا ہے یا نہیں۔

انہوں نے کہا کہ پاکستان میں تحریک انصاف نامی ایک جماعت تھی جو اب ختم ہو چکی ہے۔ جو جماعت الیکشن کمیشن میں رجسٹرڈ نہیں اس کو مخصوص نشست مل ہی نہیں سکتی، جس کا چیئرمین اور انتخابی نشان نہیں اس کو مخصوص نشست مل ہی نہیں سکتی۔