پاکستان تحریک انصاف کے صدر چودھری پرویزالہٰی نے کہا ہے کہ پولیس نے زمان پارک میں غنڈہ گردی کی ہے اور یہ سب کچھ مریم نواز کے کہنے پر راناثناءاللہ کروا رہاہے۔
میڈیا سے گفتگو کرتے ہوئے پرویزالہیٰ کا کہنا تھا کہ عمران خان کی بہن ڈاکٹر عظمیٰ نے پولیس سے سرچ وارنٹ کا پوچھا تو پولیس نے کہا کہ ہم نہیں دکھائیں گے حالانکہ عدالت نے پولیس کو سرچ وارنٹ لے کر جانے کی اجازت دی تھی۔
چودھری پرویزالہٰی نے کہا کہ اگر ایسے ہی پولیس نے غنڈہ گردی کرنی ہےا ور چادر اور چاردیواری کا تقدس پامال کرنا ہے تو پھر فلسطین،مقبوضہ کشمیر اور یہاں میں کیا فرق رہ جاتا ہے۔
انہوں نے کہا کہ عمران خان کو پہلے بھی عدلیہ نے انصاف دیا اور اب بھی عدلیہ سے انصاف کی پوری امید ہے اب اس غنڈہ گردی کے خلاف بھی عدالت سے رجوع کیا جائے گا۔
چودھری پرویز الہٰی کا کہنا تھا کہ سپریم کورٹ کے واضح احکامات ہیں کہ انتخابات وقت پر ہوں گے جس پر ہرصورت عملدر آمد ہوگا اور ہمارے مخالفین کو اس میں اپنی سیاسی موت نظر آرہی ہے۔
سابق وزیراعلیٰ پنجاب نے کہا کہ اس وقت حکمران جو حرکتیں کررہے ہیں اس سے عمران خان کی مقبولیت میں اور اضافہ ہورہاہے اور سوئی ہوئی قوم کو اب جاگنا پڑے گا۔
