اسلام آباد ٹریفک پولیس نے خواتین کو بااختیار بنانے اور انہیں روزمرہ سفر میں خودمختار بنانے کے لیے یکم سے 15 نومبر تک مفت اسکوٹی ٹریننگ پروگرام منعقد کرنے کا اعلان کیا ہے۔
ترجمان اسلام آباد ٹریفک پولیس کے مطابق چیف ٹریفک آفیسر کائنات اظہر خان کی ہدایت پر خواتین کے لیے خصوصی تربیتی پروگرام کا اہتمام کیا گیا ہے، جس کے تحت انہیں اڑان ڈرائیونگ اسکول میں اسکوٹی چلانے کی مفت عملی تربیت فراہم کی جائے گی۔
یہ بھی پڑھیں: پیٹرول کی قیمتوں میں اضافے کے باعث الیکٹرک بائیکس اور اسکوٹیز کی طلب میں نمایاں اضافہ
سی ٹی او کائنات اظہر خان کا کہنا ہے کہ اسلام آباد ٹریفک پولیس خواتین کو بااختیار اور خودمختار بنانے کے لیے مختلف اقدامات کر رہی ہے۔
’خواتین کو محفوظ، پراعتماد اور خودمختار سفری سہولیات فراہم کرنا ادارے کے مشن کا حصہ ہے۔‘
چیف ٹریفک آفیسر اسلام آباد کائنات اظہر خان کا خواتین کیلئے مفت سکوٹی ٹریننگ پروگرام کا اعلان۔
اسلام آباد ٹریفک پولیس کے اڑان ڈرائیونگ سکول میں یکم سے 15 نومبر تک خواتین کو مفت سکوٹی چلانے کی تربیت دی جائے گی۔
تربیت خواتین پولیس افسران کی زیرنگرانی فراہم کی جائے گی تاکہ خواتین… pic.twitter.com/eBgyV0anqz
— Islamabad Police (@ICT_Police) October 26, 2026
انہوں نے کہا کہ خواتین کی خوداعتمادی میں اضافہ اور انہیں روزمرہ سفر کے لیے خودانحصار بنانا اولین ترجیحات میں شامل ہے۔
’اسکوٹی چلانے کی تربیت کے ذریعے خواتین کو نقل و حرکت کے محفوظ اور آسان مواقع فراہم کیے جائیں گے۔‘
مزید پڑھیں: ہر گھر کی ضرورت اسکوٹی بنتی کیسے ہے؟
ترجمان کے مطابق تربیتی پروگرام کے دوران خواتین کو تجربہ کار خواتین پولیس افسران کی زیرنگرانی عملی تربیت دی جائے گی، تاکہ وہ اعتماد کے ساتھ اسکوٹی چلانے کے قابل ہوسکیں۔
چیف ٹریفک آفیسر کائنات اظہر خان نے خواتین پر زور دیا ہے کہ وہ مفت اسکوٹی ٹریننگ پروگرام سے بھرپور فائدہ اٹھائیں اور اپنی سفری ضروریات کے لیے خودمختاری کی جانب قدم بڑھائیں۔
