عوامی نیشنل پارٹی (اے این پی) کی مرکزی کونسل کے اجلاس میں ایمل ولی خان کو متفقہ طور پر مرکزی صدر منتخب کرلیا گیا۔
نومنتخب صدر اے این پی ایمل ولی خان نے اجلاس سے خطاب کرتے ہوئے کہاکہ پختون سرزمین پر غلامی کی زندگی گزارنا قبول نہیں، ہمیں باچا خان نے سکھایا ہے کہ ہم پختون سرزمین پر کسی کے غلام نہیں۔
مزید پڑھیں
انہوں نے کہاکہ پختونوں کو غلامی کی جس نہج پر پہنچایا گیا ہے وہ سب کو معلوم ہے، وعدہ ہے کہ ہرقدم پر اپنی قوم کے لیے آواز اٹھائیں گے۔
ایمل ولی خان نے کہاکہ تمام اداروں کو اپنے آئینی دائرہ اختیار میں رہ کر کام کرنا ہوگا اور اسی صورت میں ہی پاکستان آگے بڑھ سکے گا۔
صدر اے این پی نے کہاکہ دفاعی ادارے ہوں، عدلیہ ہو یا پارلیمان جو بھی آئین سے تجاوز کرے گا پاکستان کے لیے مشکلات ہوں گی۔
انہوں نے کہاکہ ہمیں معلوم ہے کہ کچھ لوگوں کے لیے یہ آئین کاغذ کا ٹکڑا ہے، ان کا جب دل چاہے یہ اسے ردی کی ٹوکری میں پھینک کر اپنی بادشاہت شروع کردیتے ہیں۔
صدر اے این پی نے کہاکہ ہم نے جو نعرہ پشاور، صوابی، سوات اور چارسدہ میں لگایا تھا وہ پوری قوم کی آواز ہے۔
شناخت یقینی بنانے کے لیے دہائیاں لگیں اور مشکلات کا سامنا کیا
انہوں نے کہاکہ باچا خان، ولی خان اور ان کے ساتھیوں کے خوابوں کو اسفندیار ولی خان نے تعبیر سے روشناس کیا، صوبے کو پختونخوا بنانا عوامی نیشنل پارٹی کے لیے ایک بڑا چیلنج تھا۔
ایمل ولی خان نے کہاکہ اپنی شناخت یقینی بنانے کے لیے ہمیں دہائیاں لگیں اور ہزاروں مشکلات کا سامنا کیا۔
انہوں نے کہاکہ اٹھارویں ترمیم آئین کا حصہ ہے لیکن اس پر عملدرآمد نہیں ہورہا، بلکہ اب تو خطرے سے دوچار ہے اور اس پر حملے ہورہے ہیں۔
انہوں نے کہاکہ ہمارے اکابرین نے سختیاں برداشت کیں لیکن اپنے موقف سے نہیں ہٹے، اپنے کرداراور گفتار سے قومی تحریک کے قائدین کی کمی اپنی قوم کو محسوس نہیں ہونے دوں گا۔
