اسلام آباد ہائی کورٹ نے گذشتہ ہفتہ کے روز جوڈیشل کمپلیکس میں عمران خان کی حاضری سے متعلق فائل کی گمشدگی پر ڈسٹرکٹ اینڈ سیشن جج اور آئی جی اسلام آباد پولیس سے دس روز میں رپورٹ طلب کر لی۔
ڈسٹرکٹ اینڈ سیشن کورٹ سے چیئرمین تحریک انصاف عمران خان کے ناقابل ضمانت وارنٹ گرفتاری کی منسوخی کے خلاف درخواست مسترد ہونے پر اسلام آباد ہائی کورٹ میں نظر ثانی کی درخواست پر سماعت اسلام آباد ہائی کورٹ کے چیف جسٹس عامر فاروق نے کی۔
عمران خان کے وکلا خواجہ حارث اور گوہر علی خان عدالت میں پیش ہوئے۔ ان کے مطابق عمران خان کی حاضری کی فائل ایس پی سمیع ملک سے گم ہو گئی تھی۔
عدالت نے ریمارکس دیے کہ یہ درخواست غیر موثر ہو چکی ہے۔ چیف جسٹس اسلام آباد ہائیکورٹ نے ماتحت عدالت سے دس روز میں رپورٹ طلب کرتے ہوئے سماعت سات اپریل تک ملتوی کر دی۔
