وزیرِ اعظم محمد شہباز شریف نے سرمایہ کاری بورڈ کو ملک میں سرمایہ کاری اور نئے کاروبار کے آغاز کے لیے مزید آسانیاں پیدا کرنے کا ہدف دیتے ہوئے اسے تمام متعلقہ وزارتوں اور صوبائی حکومتوں کو اعتماد میں لے کر ون ونڈو آپریشن کی طرز پر ایک طریقہ کار وضع کرنے کی ہدایت کی ہے۔
مزید پڑھیں
سرمایہ کاری و کاروباری سرگرمیوں کے لیے آسانی و فروغ یقینی بنانے کی غرض سے منعقدہ جائزہ اجلاس کی صدارت کرتے ہوئے شہباز شریف نے کہا کہ سرمایہ کاری بورڈ تمام متعلقہ وزارتوں اور صوبائی حکومتوں کو اعتماد میں لے کر ون ونڈو آپریشن کی طرز پر ایک طریقہ کار وضع کرے۔
وزیراعظم نے کہا کہ ایک ایسا طریقہ کار تجویز کیا جائے کہ سرمایہ کاروں اور نیا کاروبار شروع کرنے والے افراد کو کم سے کم رکاوٹوں کا سامنا کرنا پڑے اور اس حوالے سے بین الاقوامی شہرت یافتہ ماہرین کی خدمات بھی لی جائیں اور طریقہ کار تشکیل دیتے وقت کاروباری برادری کے نمائندوں اور صوبائی حکومت کو بھی اعتماد میں لیا جائے۔
شہباز شریف نے کہا کہ بیرونی سرمایہ کاری کے لیے دوست ممالک کے کاروباری وفود کے دورے اور اسٹاک ایکسچینج میں ریکارڈ تیزی، بیرونی و مقامی کاروباری و سرمایہ کار برادری کے حکومتی پالیسیوں پر اعتماد کی عکاسی کرتا ہے۔
اجلاس کو ملک میں سرمایہ کاری کے فروغ اور کاروبار میں آسانی کے لیے ون ونڈو آپریشن کی طرز پر جدید اور بین الاقوامی معیار کے نظام کی تشکیل کے حوالے سے تجاویز پیش کی گئیں۔
وزیرِ اعظم نے سرمایہ کاری بورڈ کو تمام متعلقہ وزارتوں، اداروں، کاروباری برادری اور صوبائی حکومتوں کو اعتماد میں لے کر جلد ایک جامع نظام کو حتمی شکل دے کر پیش کرنے کی ہدایت کی۔
’کاروبار میں کم سے کم رکاوٹیں سرمایہ کاری کو راغب کرتی ہیں‘
وزیراعظم نے کہا کہ پوری دنیا میں سرمایہ کاری وہاں جاتی ہے جہاں کاروبار میں کم سے کم رکاوٹیں ہوں۔ انہوں نے مزید کہا کہ گزشتہ دور حکومت میں بطورِ خادم پاکستان ملک میں سرمایہ کاری و کاروبار کے فروغ کے لیے ترجیحی بنیادوں پر اقدامات کیے۔
ان کا کہنا تھا کہ خصوصی سرمایہ کاری سہولت کونسل نے پالیسیوں کے تسلسل اور ملک کی معاشی بحالی کے ہدف کے حصول میں بہترین معاون کا کردار ادا کیا۔
وزیراعظم نے کہا کہ پاکستان میں کاروباری سرگرمیوں اور بیرونی سرمایہ کاری کا فروغ ہماری ٹیم کی محنت کا منہ بولتا ثبوت ہے جس پر تمام متعلقہ وزرا و افسران تعریف کے قابل ہیں۔
’بیرونی سرمایہ کاری حکومتی پالیسیوں پر اعتماد کی عکاس ہے‘
انہوں نے کہا کہ بیرونی سرمایہ کاری کے لیے دوست ممالک کے کاروباری وفود کے دورے اور اسٹاک ایکسچینج میں ریکارڈ تیزی، بیرونی و مقامی کاروباری و سرمایہ کار برادری کے حکومتی پالیسیوں پر اعتماد کی عکاسی کرتا ہے۔
اجلاس میں وفاقی وزرا جام کمال خان، محمد اورنگزیب، عبدالعلیم خان، احد خان چیمہ، رانا تنویر حسین، اعظم نذیر تارڑ، ڈپٹی چیئرمین پلاننگ کمیشن ڈاکٹر جہانزیب خان، ارکان قومی اسمبلی علی پرویز ملک بلال اظہر کیانی، وزیرِ اعظم کے کوارڈینیٹر رانا احسان افضل اور متعلقہ اعلی حکام نے شرکت کی۔ اس کے علاوہ چاروں صوبوں کے چیف سیکریٹریز اور معروف کاروباری شخصیات نے وڈیو لنک کے ذریعے اجلاس میں شرکت کی۔
