وزیراعظم شہباز شریف سے برطانوی ہائی کمشنر کی ملاقات، دوطرفہ امور پر تبادلہ خیال

وزیراعظم پاکستان شہباز شریف نے کہا ہے کہ پاکستان میں زراعت، غذائی تحفظ، انفارمیشن ٹیکنالوجی، سیاحت، کان کنی اور دیگر شعبوں میں بے پناہ استعداد ہے، ہم حکومتی گورننس کے ڈھانچے اور ادارہ جاتی اصلاحات کی طرف گامزن ہیں۔

وزیراعظم شہباز شریف سے پاکستان میں تعینات برطانوی ہائی کمشنر جین میریٹ نے ہفتہ کو ملاقات کی ہے۔

ملاقات میں اکنامکس اینڈ ایویلیوایشن ڈائریکٹوریٹ، فارن کامن ویلتھ اینڈ ڈویلپمنٹ آفس لندن کے چیف اکانومسٹ و ڈائریکٹر پروفیسر عدنان خان بھی موجود تھے۔ اس موقع پر دو طرفہ امور پر بات چیت کی گئی۔

ملاقات کے دوران وزیراعظم شہباز شریف نے برطانوی ہائی کمشنر سے گفتگو کرتے ہوئے کہاکہ پاکستان اور برطانیہ کے درمیان دیرینہ تعلقات ہیں جو وقت کے ساتھ مزید مضبوط ہو رہے ہیں، پاکستان برطانیہ اور دیگر ممالک سے سرمایہ کاری کا خواہاں ہیں۔

وزیراعظم نے کہاکہ پاکستان میں زراعت، غذائی تحفظ، انفارمیشن ٹیکنالوجی، سیاحت، کان کنی اور دیگر شعبوں میں بے پناہ استعداد ہے۔

’ہم حکومتی گورننس کے ڈھانچے اور ادارہ جاتی اصلاحات کی طرف گامزن ہیں‘

انہوں نے مزید کہاکہ ہم حکومتی گورننس کے ڈھانچے اور ادارہ جاتی اصلاحات کی طرف گامزن ہیں جبکہ فیڈرل بورڈ آف ریونیو کی ڈیجیٹائزیشن حتمی مراحل میں ہے اور ملکی معیشت کی بحالی کے لیے میکرو اور مائیکرو اکنامک سطح پر اقدامات اٹھائے جارہے ہیں۔

اس موقع پر برطانوی وفد نے حکومت پاکستان کی جانب سے تعلیمی ایمرجنسی کے اقدام کو سراہا۔

ملاقات میں نائب وزیراعظم و وزیر خارجہ سینیٹر محمد اسحاق ڈار بھی موجود تھے۔