نائب وزیراعظم و وزیر خارجہ سینیٹر اسحاق ڈار 13 سے 16 مئی تک عوامی جمہوریہ چین کے دار الحکومت بیجنگ کا 4 روزہ دورہ کریں گے۔
دفتر خارجہ کے مطابق اسحاق ڈار اپنے دورے کے دوران چینی وزیر خارجہ اور چین کی کمیونسٹ پارٹی کے امور خارجہ کمیشن، جنرل آفس کے ڈائریکٹر وانگ یی کے ساتھ پانچویں پاک چین وزرائے خارجہ اسٹریٹجک ڈائیلاگ کی مشترکہ صدارت کریں گے۔
مزید پڑھیں
دفتر خارجہ نے بتایا کہ اس موقع پر فریقین اقتصادی اور تجارتی تعاون، اعلیٰ سطح کے تبادلے اور دورے، چین پاکستان اقتصادی راہداری کی اپ گریڈیشن اور مستقبل کے رابطے کے اقدامات سمیت پاک چین دوطرفہ تعلقات کا جامع جائزہ لیں گے۔ دونوں رہنما علاقائی جغرافیائی سیاسی منظر نامے اور کثیرالجہتی فورم پر دوطرفہ تعاون پر بھی تبادلہ خیال کریں گے۔
ترجمان کے مطابق اسٹریٹیجک ڈائیلاگ کے موقع پر نائب وزیراعظم اور وزیر خارجہ محمد اسحاق ڈار کی چینی رہنماؤں، سینیئر وزرا اور کارپوریٹ شعبہ کے سرکردہ ایگزیکٹوز سے ملاقات بھی متوقع ہے۔
ترجمان نے بتایا کہ نائب وزیراعظم کا دورہ پاکستان اور چین کے درمیان اعلیٰ سطح کے باقاعدہ تبادلوں کا حصہ ہے۔ یہ دورہ ’آل ویدر اسٹریٹجک کوآپریٹو پارٹنرشپ‘ کو مزید گہرا کرنے، بنیادی دلچسپی کے امور پر باہمی تعاون کی توثیق، سی پیک سمیت اقتصادی اور تجارتی تعاون کے فروغ، علاقائی امن اور ترقی کے لیے مشترکہ عزم کو تقویت دینے کے حوالہ سے دونوں ممالک کے عزم اور اس کی اہمیت کی عکاسی کرتا ہے۔
