وزیراعلیٰ آفس لاہور میں چیف منسٹر یوتھ انیشیٹیو کے تحت طلبا کو بلا سود اور آسان اقساط پر ای بائیکس کی ای بیلٹنگ کا عمل مکمل کر لیا گیا ہے۔ صوبائی وزیر ٹرانسپورٹ بلال اکبر خان نے ای بائیکس اور پیٹرول بائیکس کے لیے موصول ہونے والی درخواستوں کی ای بیلٹنگ کی۔
صوبائی وزیر ٹرانسپورٹ نے بٹن دبا کر طلبا وطالبات کے لیے 4 مختلف کیٹیگری کی ای بیلٹنگ کی۔ اس موقع پر ان کا کہنا تھا کہ وزیراعلیٰ پنجاب خواتین کی امپاور منٹ کے لیے نہایت احسن اقدامات کررہی ہیں۔ وزیراعلی کی ہدایت پر ورکنگ ویمن اور سپیشل افراد کے لیے شاندار اسکیمیں لارہے ہیں۔
مزید پڑھیں
انہوں نے کہا کہ بلا سود اور آسان اقساط پر بائیکس انفراسٹرکچر کی تبدیلی نہیں بلکہ کلچر کی تبدیلی ہے، ان شا اللہ جلد دوسرے فیز کا آغاز کریں گے، دوسرے فیز میں ای بائیکس کی تعداد زیادہ رکھیں گے۔
سیکریٹری ٹرانسپورٹ احمد جاوید قاضی نے طلبا کو بلا سود آسان اقساط پر بائیکس دینے کے پراجیکٹ پر بریفنگ میں بتایا کہ شفاف ای بیلٹنگ کے ذریعے ایک ہزار ای الیکٹرک بائیکس اور 19 ہزار پیٹرول بائیکس دی جا رہی ہیں، الیکٹرک بائیک لاہور، راولپنڈی، فیصل آباد، ملتان اور بہاولپور کے طلبا و طالبات کو دی جائیں گی۔
ایک اور وعدے کی تکمیل
چیف منسٹر یوتھ انیشیٹیو کے تحت طلبا کوبلا سود اور آسان اقساط پر بائیکس کی ای بیلٹنگ کا عمل مکمل
صوبائی وزیر ٹرانسپورٹ @Bilal_AkbarKhan نے بلا سود اور آسان اقساط پر ای بائیک اور پٹرول بائیک کے لئے موصول ہونے والی درخواستوں کی ای بیلٹنگ کی pic.twitter.com/7prHRcN7Xz
— Government of Punjab (@GovtofPunjabPK) May 11, 2024
تمام اضلاع کے طلبہ نے آن لائن درخواستیں جمع کرائیں۔ ایک لاکھ 90 ہزار طلبہ نے رجسٹریشن کرائی 72 ہزار 640 طلبہ نے آن لائن درخواستیں جمع کرائیں۔ اس موقع پر مختلف جامعات کے وائس چانسلرز اور طلبا و طالبات بھی موجود تھے۔
طالب علموں کو ای بائیکس دیں گے تو وہ ون ویلنگ کریں گے، لاہور ہائیکورٹ
لاہور ہائیکورٹ کے جسٹس شاہد کریم نے 10 مئی کو اسموگ کیس کی سماعت کے دوران دلچسپ ریمارکس دیے تھے کہ طالب علموں کو الیکٹرانک بائیکس دیں گے تو وہ ون ویلنگ کریں گے اور لڑکیوں کے اسکول کے باہر بھی جائیں گے۔ طالب علموں کو پبلک ٹرانسپورٹ کی طرف راغب کیا جائے، حکومت الیکٹرک بائیکس کے بجائے کالجز کو الیکٹرک بسیں فراہم کرے۔
عدالت نے الیکڑک بائیکس کی قرعہ اندازی عدالتی حکم کے ساتھ مشروط کر دی تھی اور پنجاب حکومت کو پیر تک طالب علموں میں الیکٹرک بائیکس تقسیم نہ کرنے کا حکم دیا تھا۔
