گندم اسکینڈل کی تحقیقات نیب سے کرانے کے لیے لاہور ہائیکورٹ میں درخواست دائرکرتے ہوئے شہری نے موقف اپنایا ہے کہ حکومتی سطح پر تشکیل کردہ کمیٹی شفاف تحقیقات نہیں کر سکتی۔
مزید پڑھیں
ندیم سرور ایڈوکیٹ کی وساطت سے لاہور ہائیکورٹ میں شہری مشکور حسین کی جانب سے دائر کی گئی درخواست میں وزیر اعظم کو بذریعہ پرنسپل سیکریٹری، سابق نگراں وزیراعظم، نیب اور وفاقی حکومت کو فریق بنایا گیاہے۔
درخواست میں بتایا گیا ہے کہ مسلم لیگ ن کی حکومت کے پہلے دو ماہ میں 7.78 لاکھ میٹرک ٹن گندم درآمد کی گئی، حکومت خود گندم اسکینڈل کا حصہ ہے، میرٹ پر تحقیقات ممکن نہیں، حکومتی سطح پر تشکیل کردہ کمیٹی شفاف تحقیقات نہیں کر سکتی۔
درخواست گزار کا کہنا ہے کہ انہوں نے نیب کو گندم میگا اسکینڈل کی تحقیقات کے لیے درخواست دی لیکن اس پر کوئی کارروائی نہیں کی گئی، نیب کو گندم میگا اسیکنڈل کی تحقیقات کا حکم دینے کی استدعا کرتے ہوئے درخواست گزار نے زور دیا ہے کہ گندم اسکینڈل کے محرکات کا تعین کر کے رقم وصول کی جائے اور قومی خزانے میں جمع کرائی جائے۔