وزیر اعظم محمد شہباز شریف نے کہا ہے کہ کسان کا نقصان کسی صورت برداشت نہیں کیا جائے گا۔ حکومت ملک میں غذائی تحفظ یقینی بنانے کے حوالے سے ہر ممکن کوششیں کر رہی ہے۔ کسانوں کی ترقی و خوشحالی کے لیے بھرپور اقدامات اٹھائے جائیں گے۔
وزیراعظم محمد شہبازشریف نے گندم کی طلب و رسد اور وفاقی حکومت کی خریداری کے پروگرام کے حوالے سے ایک اعلیٰ سطح اجلاس کی صدارت کی۔ ان کا کہنا تھا کہ گندم کی خریداری کے عمل کے لیے موبائل ایپلی کیشن کیوں تیار نہیں کروائی گئی؟
مزید پڑھیں
وزیراعظم نے گندم کی خریداری کے عمل میں ٹیکنالوجی کے استعمال کے حوالے سے ہدایات پر عمل نہ کرنے اور غفلت برتنے پر پاسکو کے منیجنگ ڈائریکٹر اور جنرل مینیجر پروکیورمنٹ کو معطل کرنے کی ہدایت کرتے ہوئے موبائل فون ایپلی کیشن تیار کرنے کی تاکید کی کہ گندم کی خریداری کا عمل صاف اور شفاف بنانے کے حوالے سے ٹیکنالوجی کا استعمال کیا جائے۔
وزیراعظم نے پاسکو کے اسٹاک کا تھرڈ پارٹی آڈٹ کروانے کی ہدایت کرتے ہوئے کسان کے معاشی تحفظ کے لیے اجناس کی انشورنس کو یقینی بنانے کی ہدایت بھی کی اور کہا کہ پاسکو 4 لاکھ میٹرک ٹن اضافی گندم کی شفاف اور مؤثر طریقے سے خریداری کرے۔
وزیراعظم نے کہا کہ اچھی کارکردگی دکھانے والے پاسکو مراکز اور افسران کا انتخاب کیا جائے گا اور ان کی حکومتی سطح پر پذیرائی کی جائے گی۔
