چیف آف آرمی اسٹاف جنرل سیّد عاصم منیر نے کہا ہے کہ مادر وطن کے دفاع کے لیے جان دینے سے بڑھ کر کوئی چیز نہیں، ہمارے شہدا کی قربانیاں انتہائی لگن اور قربانی کے جذبے کے ساتھ لڑنے کے ہمارے عزم کو مضبوط کرتی ہیں۔
پاک فوج کےشعبہ تعلقات عامہ (آئی ایس پی آر) کے مطابق جنرل ہیڈ کوارٹر (جی ایچ کیو) راولپنڈی میں فوجی افسروں اور جوانوں کو اعزازات سے نوازنے کے لیے تقریب کا انعقاد کیا گیا جس میں آرمی چیف جنرل عاصم منیر نے فوجی جوانوں کو اعزازات سے نوازا۔
تقریب میں فوج کے اعلیٰ افسران، ایوارڈ یافتہ افراد کے اہل خانہ کی بڑی تعداد نے شرکت کی۔ افسران اور جوانوں کو ستارہ امتیاز (ملٹری) اور تمغہ بسالت سمیت دیگر اعزازات سے نواز گیا، جبکہ شہدا کے تمغے ان کے اہلخانہ نے وصول کیے۔
آرمی چیف نے مزید کہاکہ شہدا اور غازی ہمارے قومی ہیرو ہیں۔ قومی آزادی اور سلامتی بہادر جنگجوؤں کی قربانیوں کی مرہون منت ہے۔ ہمارے شہدا درحقیقت قوم کے لیے امید اور استقامت کی کرن ہیں۔
