بیشتر علاقوں میں جھلسا دینے والی گرمی کا راج، شہری احتیاط برتیں

سندھ اور پنجاب کے میدانی علاقوں میں جھلسا دینے والی گرمی کا راج۔ جنوبی علاقوں میں دن کے درجہ حرارت میں بتدریج اضافہ جاری۔ بارش کے آثار نہیں اور ملک کے بیشتر علاقوں میں موسم گرم اور خشک رہنے کا امکان ہے۔

محکمہ موسمیات نے عوام کو باخبر کردیا۔ گرمی کی شدت اس قدر بڑھ رہی ہے جیسے سورج زمین کے قریب آ گیا ہو۔ آج بھی ملک بھر میں گرمی کا راج برقرار ہے۔ سندھ اور پنجاب کے میدانی علاقوں میں موسم اس قدر شدید گرم ہے کہ انسانوں کیساتھ ساتھ حیوانات بھی جھلسنے لگے ہیں۔

محکمہ موسمیات نے ملک کے بیشتر علاقوں میں موسم گرم اور خشک رہنے کا امکان ظاہر کرتے ہوئے کہا کہ جنوبی علاقوں میں دن کے درجہ حرارت میں بتدریج اضافے کا امکان ہے۔ عوام کو متنبہ کیا گیا ہے کہ تربت کا درجہ حرارت 46، مٹھی اور سبی کا 44، حیدرآباد، سکھر، دادو، نواب شاہ 43 جبکہ بہاولپور اور ملتان میں درجہ حرارت 42 ڈگری سینٹی گریڈ تک جا سکتا ہے۔

گزشتہ روز سب سے زیادہ گرمی تربت اور جیکب آباد میں پڑی جہاں درجہ حرارت 45 ڈگری سینٹی گریڈ تک پہنچ گیا۔ روہڑی اور خیر پور میں درجہ حرارت 44 ڈگری سینٹی ریکارڈ کیا گیا۔

ملک کے شمالی حصے میں ہلکی بارش کا امکان ہے جبکہ ملک میں پری مون سون بارشوں کا آغاز جون کے آخری دنوں میں ہوسکتا ہے۔