اسحاق ڈار کا دورہ چین، خنجراب بارڈر کراسنگ کے ذریعے رابطے اور ویزا نظام آسان کرنے پر غور

پاکستان اور چین نے سی پیک کے دوسرے مرحلے کی پیشرفت پر اطمینان کا اظہار کرتے ہوئے باہمی دوستی کو مزید گہرا کرنے پر اتفاق کیا ہے۔

بدھ کے روز نائب وزیر اعظم و وزیر خارجہ سینیٹر محمد اسحاق ڈار نے بیجنگ میں چین کے ایگزیکٹو نائب وزیراعظم ڈنگ زوکسیان سے ملاقات کی اور ان سے خیبرپختونخوا کے علاقے شانگلہ میں دہشتگردوں کے حملے میں 5 چینی انجنیئرز کی ہلاکت پر تعزیت کا اظہار کیا۔

وزیرخارجہ اسحاق ڈار نے ڈنگ زوکسیان کو چینی انجنیئرز کے قتل میں ملوث مجرموں کو کیفرکردار تک پہنچانے کی یقین دہانی کرائی اورجاں بحق ہونے والے چینی کارکنوں کی خدمات کو سراہا۔

اس موقع پر دونوں رہنماؤں نے پاک چین اقتصادی راہداری (سی پیک) کے دوسرے مرحلے، تجارت، اقتصادی تعاون اور سرمایہ کاری سمیت دو طرفہ تعلقات کے مختلف پہلوؤں پر تفصیلی تبادلہ خیال کیا۔

دونوں رہنماؤں نے خنجراب بارڈر کراسنگ کے ذریعے رابطے اور ویزا کے آسان نظام پر بھی تبادلہ خیال کیا اور تمام شعبوں میں پاک چین تعلقات کی بڑھتی ہوئی رفتار کو برقرار رکھنے اور پاک چین دوستی کو مزید گہرا کرنے پر اتفاق کیا۔

وزیر خارجہ  اسحاق ڈار نے توانائی اور انفراسٹرکچر میں سی پیک کی پیشرفت کا جائزہ لیا اور صنعت، زراعت اور معدنی ترقی کے شعبوں میں دوسرا مرحلے کے تحت مثبت منافع پر اعتماد کا اظہار کیا۔

چین کے نائب وزیراعظم ڈنگ زوکسیان نے اس موقع پر معیشت، تجارت اور سرمایہ کاری سمیت تعاون کے تمام شعبوں میں پاکستان کے لیے چین کی مکمل حمایت کا اظہار کیا اور پاک چین باہمی خوشحالی اور ترقی کے لیے سی پیک منصوبوں پر تیزی سے عمل درآمد کی اہمیت کا اعادہ بھی کیا ہے۔