وزیراعلیٰ خیبر پختونخوا علی امین گنڈاپور نے صوبے میں لوڈشیڈنگ کم کرنے کے لیے آج رات تک شیڈول جاری کرنے کی ڈیڈلائن دیدی۔
اپنے ایک بیان میں وزیراعلیٰ نے کہاکہ میں وفاقی وزیر توانائی اور وفاقی حکومت کو واضح پیغام دیتا ہوں کہ ہم کمزور نہیں، اگر کل تک لوڈشیڈنگ کا معاملہ ٹھیک نہ ہوا تو میں بجلی کا سارا سسٹم ٹیک اوور کرلوں گا۔
مزید پڑھیں
علی امین گنڈاپور نے کہاکہ خیبر پختونخوا میں جاری ظالمانہ لوڈشیڈنگ کو کم کرنے کے لیے بار بار بات کرنے کے باوجود صورتحال جوں کی توں ہے، میں مل بیٹھ کر مسئلے کا حل نکالنے کی بات کرتا ہوں لیکن آپ شرافت کی زبان کو کمزوری سمجھتے ہیں۔
انہوں نے کہاکہ میں واضح پیغام دیتا ہوں کہ اگر آج رات تک لوڈشیڈنگ کو کم کرنے کے لیے شیڈول جاری نہ ہوا اور لوڈ شیڈنگ میں 5 سے 6 گھنٹے کی کمی نہ آئی تو کل میں چیف پیسکو کے دفتر جاکر خود شیڈول جاری کروں گا۔
وزیراعلیٰ نے کہاکہ اس کے بعد بجلی آن آف کرنے کا بٹن صوبے کے لوگوں کے ہاتھ میں آئے گا، پھر میں دیکھتا ہوں کہ آپ لوگ میرا حق کیسے نہیں دیتے، میں اپنا حق لینا جانتا ہوں۔
انہوں نے کہاکہ پیسکو چیف اگر صوبے میں رہے گا تو میرے شیڈول کے مطابق چلے گا۔ ’میں بار بار کہہ رہا ہوں کہ صوبے کے واجبات میں سے کٹوتی کرکے میرے لوگوں کو چور کہنے کے بجائے انہیں ریلیف دیا جائے‘۔
وزیراعلیٰ نے کہاکہ ہم سستی بجلی دے رہے ہیں اور مہنگی خریدنے پر مجبور ہیں، مینڈیٹ چوری کرکے اقتدار میں بیٹھنے والے لوگ میرے صوبے کے ساتھ زیادتی کر رہے ہیں۔
انہوں نے وفاقی حکومت کو مخاطب کرتے ہوئے کہاکہ آپ میرے صوبے کے حقوق پر ڈاکہ ڈال رہے ہیں اور میرے لوگوں پر بوجھ ڈال رہے ہیں، اگر میرے صوبے کے حق پر ڈاکہ ڈالیں گے تو میں آپ کو آرام سے بیٹھنے نہیں دوں گا۔
