جرمنی کے لیے اسٹوڈنٹ ویزے کے شیڈول کا اعلان، ترجیح کسے ملے گی؟

پاکستان میں قائم جرمن سفارتخانے نے اسٹوڈنٹ ویزا کے لیے درخواستوں کے شیڈول کا اعلان کر دیا۔

جرمن سفارت خانے نے 21 مئی سے شروع ہونے والے موسم سرما کے سمسٹر 2024-2025 کے لیے اسٹوڈنٹ ویزا کی رجسٹریشن کے آغاز کا اعلان کرتے ہوئے بتایا کہ 2024 کے سمر سمسٹر کے لیے داخلہ لیٹر والے طلبا کو ایم اے کے آخر تک اپوائنٹمنٹس آفر دینی بند کردی جائے گی جبکہ 2024 کے سمر سمسٹر کے لیے 15 مئی کے بعد کا کوئی بھی داخلہ لیٹر خود بخود منسوخ ہو جائے گا۔ سفارتخانے کے مطابق اس حوالسے سے متاثرہ طلبا کو ای میل کے ذریعے مطلع کردیا جائے گا۔

سفارتخانے کا کہنا ہے کہ ویزا کے عمل کو ہموار کرنے اور سفارت خانے کو موصول ہونے والی درخواستوں کی بڑی تعداد کو حل کرنے کے لیے یہ اقدام کیا جا رہا ہے۔

اسکالرشپ کے حامل اور پی ایچ ڈی طلبا  کو ترجیح دی جائے گی

جرمنی کے سفارتخانے نے یہ بھی اعلان کیا ہے کہ ویزے کے حوالے سے جرمن اداروں سے اسکالرشپ کے حامل درخواست دہندگان اور پی ایچ ڈی طلبا کو ترجیح دی جائے گی جبکہ ایسے طلبا کے لیے ایک خصوصی آن لائن رجسٹریشن کیٹیگری ہے جنہوں نے 3.7 یا اس سے اوپر کا سی جی پی اے حاصل کیا ہے۔

درخواست دہندگان کو ویزا کی درخواست کے لیے دستاویزات کا ایک جامع سیٹ تیار کرنا ہوگا جن میں مختلف فارم، پاسپورٹ اور شناخت کی کاپیاں، تعلیمی ریکارڈ، مالی ذرائع کا ثبوت اور ہیلتھ انشورنس شامل ہیں۔