سپریم کورٹ میں پی ٹی آئی رہنماؤں کے خلاف توہین عدالت کی درخواست دائر

سپریم کورٹ میں پاکستان تحریک انصاف (پی ٹی آئی) کے رہنماؤں کے خلاف توہین عدالت کی درخواست دائر کردی گئی۔

درخواست ایڈووکیٹ میاں داؤد کی جانب سے دائر کی گئی ہے جس میں پاکستان تحریک انصاف کے رہنما شعیب شاہین اور رؤف حسن کو فریق بنایا گیا ہے۔

درخواست میں سپریم کورٹ سے استدعا کی گئی ہے کہ پی ٹی آئی کے ترجمان رؤف حسن اور شعیب شاہین کے خلاف آرٹیکل 204 کے تحت توہین عدالت کی کارروائی کی جائے۔

میاں داؤد ایڈووکیٹ نے اپنی درخواست میں مؤقف اختیار کیا کہ پی ٹی آئی کے رہنما باقاعدگی سے اعلیٰ عدلیہ کو بدنام کررہے ہیں۔

درخواست میں مؤقف اختیار کیا گیا کہ چیف جسٹس قاضی فائز عیسیٰ اور چیف جسٹس عامر فاروق کے خلاف پرنٹ، الیکٹرانک اور سوشل میڈیا کے ذریعے مہم چلائی جا رہی ہے۔

درخواست میں کہا گیا کہ سابق وفاقی وزیر فیصل واوڈا اور ایم کیو ایم کے رہنما مصطفیٰ کمال نے بھی تحریک انصاف کے طرز کی پریس کانفرسز کیں، سپریم کورٹ کا فیصل واوڈا اور مصطفیٰ کمال کے خلاف توہین عدالت پر شوکاز کرنا احسن اقدام ہے۔

واضح رہے کہ سابق وفاقی وزیر فیصل واوڈا اور ایم کیو ایم رہنما مصطفیٰ کمال نے گزشتہ ہفتے عدلیہ مخالف پریس کانفرنسز کی تھیں جس پر سپریم کورٹ نے ازخود نوٹس لے کر دونوں رہنماؤں کو توہین عدالت کا نوٹس جاری کیا تھا۔ عدالت نے 18 مئی کو کیس کی سماعت کرتے ہوئے فیصل واوڈا اور مصطفیٰ کمال کو آئندہ سماعت پر پیش ہونے اور 2 ہفتے کے اندر توہین عدالت کے نوٹسز کے جواب دینے کا حکمنامہ جاری کیا تھا۔