فلسطین کی آزادی پسند تحریک حماس کے مسلح ونگ القسام بریگیڈ کے ترجمان نے دعویٰ کیا ہے کہ جنگجوؤں نے ہفتے کے روز شمالی غزہ کے جبالیہ میں لڑائی کے دوران اسرائیلی فوجیوں کو ہلاک اور زخمی کیا، کچھ فوجیوں کو قیدی بھی بنا لیا، اسرائیلی فوج نے اس دعوے کی تردید کی ہے۔
مزید پڑھیں
القسام بریگیڈز کے ترجمان ابوعبیدہ نے اپنے ویڈیو پیغام میں کہا ہے کہ ‘ہمارے جنگجوؤں نے صہیونی فوج کو ایک سرنگ کے اندر گھات لگانے کے لیے آمادہ کیا، جنگجوؤں نے گھات میں آئے کئی اسرائیلی فوجیوں کو ہلاک کیا، کچھ اسرائیلی فوجی زخمی ہوئے اور متعدد کو قیدی بنا لیا گیا ہے۔
اسرائیل کی تردید
غیر ملکی خبررساں ادارے رائٹرز کے مطابق اسرائیلی فوج نے حماس کے اس دعوے کی تردید کی ہے، اسرائیلی فوج نے کہا ہے کہ ’ایسا کوئی واقعہ نہیں پیش آیا، جس میں کسی فوجی کو اغوا کیا گیا ہو۔‘
واضح رہے 7 اکتوبر سے غزہ پر ہونے والے اسرائیلی حملوں میں اب تک 35 ہزار سے زائد فلسطینی شہید ہوچکے ہیں جن میں بڑی تعداد میں بچے اور خواتین شامل ہیں۔
