کے الیکٹرک کے بعد اینگرو پاور جن نے بھی واجبات نہ ملنے کی صورت میں خطرے کی گھنٹی بجاد دی، اور سینٹرل پاور پرچیز ایجنسی کے سی ای او کو لکھے خط میں 29مئی 2024تک واجبات کی ادائیگی کا مطالبہ کردیا۔
مزید پڑھیں
اینگرو پاورجن تھر نے سینٹرل پاور پرچیز ایجنسی کو واجبات کی ادائیگی کے لیے خط لکھ ڈالا، اینگرو نے لکھا کہ بجلی کی مد میں واجبات کی مالیت 76ارب روپے سے تجاوز کرگئی ہے۔ ایک سال میں کمپنی کے واجبات 39.5 ارب روپے سے بڑھ کر 76 ارب روپے کی بلند سطح پر پہنچ چکے ہیں۔
خط کے متن کے مطابق واجبات کی عدم ادائیگی کی وجہ سے مالیاتی مسائل میں اضافہ ہوا ہے، اپنے سپلائرز اور پارٹنرز کو ادائیگیوں میں شدید مشکلات کا سامنا ہے، جس سے پاور پلانٹ کے آپریشنز متاثر ہونے کا خدشہ ہے۔
اینگرو پاور جن تھر کے مطابق رواں سال کی اب تک اوسط ریکوری کی شرح 75 فیصد ہے۔ اینگرو پاور جن تھر کو ایک ایسے بحران کا سامنا ہے جو اس سے پہلے کبھی نہیں ہوا۔ اگر سینٹرل پاور پرچیز ایجنسی نے فوری توجہ نہ دی تو ممکنہ طور پر کمپنی کے ڈیفالٹ کرجانے کا خطرہ ہے۔
خط میں مزید لکھا گیا کہ 75ارب روپے کے پچھلے واجبات کے ساتھ 15ارب روپے کی اضافی ادائیگیاں کی جائیں، اینگرو پاور جن تھر پاور پرچیز ایگری منٹ اور انٹرایجنسی ایگری منٹ ہے، اس کے تحت کمپنی کو ساورن گارنٹی ان کیش کرانے سمیت واجبات کی عدم ادائیگی پر آپریشنز معطل کرنے کا حق حاصل ہے۔
