ایف آئی اے نے جعلی سفری دستاویزات بنانے میں ملوث انسانی اسمگلر کو گرفتار کرلیا۔
ترجمان ایف آئی اے نے بتایا کہ اینٹی ہیومن ٹریفکنگ سرکل کراچی نے جعلی سفری دستاویزات بنانے میں ملوث انسانی اسمگلر کو قلیل وقت میں گرفتار کر لیا ہے۔
مزید پڑھیں
ترجمان کے مطابق انسانی اسمگلر بابر علی کو کینٹ اسٹیشن کراچی سے گرفتار کیا گیا ہے، ملزم نے گلفام احمد نامی مسافر کو اندوڑا کا جعلی ورک ویزا فراہم کیا تھا۔
ترجمان ایف آئی اے نے بتایا کہ مذکورہ ویزے کی بنیاد پر مسافر کو گزشتہ روز آف لوڈ کر کے اینٹی ہیومن ٹریفکنگ سرکل کراچی منتقل کیا گیا تھا۔
ترجمان کے مطابق ملزم نے مذکورہ ویزے کے عوض 24 لاکھ روپے کا تقاضا کیا تھا جبکہ 12 لاکھ روپے وصول بھی کرچکا تھا۔
ترجمان نے مزید بتایا کہ ملزم سے تفتیش کا آغاز کردیا ہے جبکہ دیگر ملزمان کی گرفتاری کے لیے چھاپے مارے جا رہے ہیں۔
