مسائل کا واحد حل عمران خان سے مذاکرات، چاہے حکومت کرے یا اسٹیبلشمنٹ، فواد چوہدری

پی ٹی آئی کے رہنما اور سابق وفاقی وزیر فواد چوہدری نے کہا ہے کہ پاکستان کے مسائل کا واحد حل عمران خان سے مذاکرات ہیں، وہ چاہے حکومت کرے یا اسٹیبلشمنٹ کرے، مذاکرات ناگزیر ہیں۔

سپریم کورٹ کے باہر میڈیا سے گفتگو میں فواد چوہدری کا کہنا تھا کہ پی ٹی آئی سے گزارش ہے کہ وہ پُرجوش نہ ہو اور اسٹیبلشمنت اور حکومت سے گزارش ہے کہ وہ جارحانہ طرز عمل مت اپنائیں۔ عمران خان کے پاس پاکستان کے عوام کی طاقت ہے، اور عوام کی طاقت کے آگے کوئی کھڑا نہیں ہوسکتا۔

فواد چوہدری کا کہنا تھا کہ ججوں کو گھر بھیجنے یا مارشل لگانے یا ایمرجنسی پلس لگانے کے مشورے دینے والے غلط ہیں، جو ہو گیا سو ہو گیا اب آگے بڑھیں۔ عمران خان پر مقدمات نواز شریف یا مریم نواز والے مقدمات نہیں یہ مذاق ہو رہا ہے، ان مقدمات میں ہے کیا؟ عدت کیس نے دنیا بھر میں عدلیہ کا مذاق بنایا۔

ان کا کہنا تھا کہ عمران خان سے ملاقاتیں ہوئی ہیں، اب بھی وہ بلائیں گے تو چلا جاؤں گا۔ عمران خان جیل میں ہیں، حکومت اور اسٹیبلشمنٹ فیصلہ کرے کہ حالات نارمل کرنے ہیں۔ 3 ماہ بعد عمران خان کو مذاکرات کی ضرورت نہیں رہے گی۔

انہوں نے کہا کہ مذہب کے نام پر سرگودھا میں جو کچھ ہوا وہ اسی تسلسل کا نتیجہ ہے کہ حکومت مذہب کو مخالفین کے خلاف استعمال کرتی ہے۔ سیاست میں اسٹیبلشمنٹ کا کردار ہے، اس لیے انہیں مخاطب کیا جاتا ہے، اگر ان کا رول نہیں ہوگا تو کوئی انہیں کچھ نہیں کہے گا۔