ماڈل کے الزامات، مداح چاہت فتح علی کے دفاع میں سامنے آگئے

بے سرے گانوں سے شہرت پانیوالے مبینہ گلوکار چاہت فتح علی خان کے وائرل ہٹ گانے ’بدو بدی‘ نے انٹرنیٹ پر دھوم مچا دی ہے، اس گانے کو ایک مہینے میں 28 ملین سے زائد مرتبہ دیکھا جاچکا ہے۔

چاہت فتح علی خان کا گانا ’بدو بدی‘ گانا ہندوستان اور پاکستان سمیت دیگر کئی ممالک میں مقبول ہو رہا ہے، اس گانے کی حیرت انگیز کامیابی کے بعد چاہت فتح علی خان اور گانے کی ماڈل وجدان راؤ دنیا بھر میں مشہور ہو گئے ہیں۔

اپنے گانے کی کامیابی کے بعد دونوں اب مختلف فورم پر انٹرویوز دے رہے ہیں لیکن گانے میں جلوہ گر وجدان راؤ فی الحال چاہت فتح علی خان کے ساتھ بول چال بند کر چکی ہیں۔

حال ہی میں ’بدو بدی‘ کی ماڈل گرل وجدان راؤ نے ایک پریس کانفرنس کرتے ہوئے چاہت فتح علی خان کے خلاف سخت باتیں کی ہیں، وجدان راؤ نے دعویٰ کیا کہ چاہت فتح علی خان نے انہیں معقول معاوضہ نہیں دیا، گانا وائرل ہونے کے بعد انہوں نے چاہت فتح علی سے بھاری رقم کا مطالبہ بھی کیا۔

لیکن لگتا یہ ہے کہ چاہت فتح علی خان کے مداحوں کی تعداد بہت زیادہ ہے کیونکہ ماڈل وجدان راؤ کی پریس کانفرنس کے بعد انہیں اپنے مداحوں کی جانب سے کافی پذیرائی مل رہی ہے۔

مداحوں کا موقف ہے کہ ماڈل وجدان راؤ نے وائرل گانے ’بدو بدی‘ کے ذریعے شہرت حاصل کی ہے جس کے لیے انہیں چاہت فتح علی خان کی عزت کرنی چاہیے، جو ان کے پروپیگنڈے کے باوجود ان کے خلاف لب کشائی سے گریزاں ہیں۔

گانا ہٹ ہونے کے بعد بہت سے سوشل میڈیا صارفین نے ماڈل وجدان کو ان کے ’مطالبات‘ پر ٹرول کرتے ہوئے یہاں تک بھی لکھا کہ انہوں نے ماڈل پر توجہ نہیں دی کیونکہ وہ چاہت فتح علی خان کی ’مایہ ناز گلوکاری‘میں دلچسپی رکھتے تھے۔

بعض مداحوں کا کہنا ہے کہ ماڈل وجدان راؤ پہلے ایک ’شرمندگی سے دوچار‘ کرنیوالے گانے میں نظر آئیں اور اب اس نوعیت کی سستی شہرت کے حربے آزما رہی ہیں، مداحوں نے ان پر زور دیا کہ وہ اپنی ’شہرت‘ کو ذرا تمیز سے سنبھالیں۔