اپنوں سے ملاقات، قیدیوں کی بھی عید ہوگئی

وزیراعلیٰ پنجاب کی ہدایت پر دورانِ عید اسیران کی اہل خانہ سے ملاقات کے لیے خصوصی انتظامات کی بدولت قیدیوں کی بھی عید ہوگئی۔

وزیراعلیٰ پنجاب مریم نوازشریف کی ہدایت پر عیدالاضحیٰ کے موقع پر پنجاب کی جیلوں میں قیدیوں کی اہل خانہ سے ملاقات کے لیے خصوصی انتظامات کیے گئے تھے، صوبے بھر میں 21 ہزار 685 اسیران نے اپنے اہل خانہ سے ملاقات کی۔

عید کے 2 دنوں میں 25 ہزار 213 شہریوں نے جیلوں میں اسیران سے ملاقات کی، باضابطہ ملاقات کے علاوہ قیدیوں کو آڈیو اور ویڈیو کال کی سہولت بھی فراہم کی گئی، گرمی کے پیش نظر ملاقاتی کمروں میں ایئر کنڈیشنر نصب کیے گئے تھے۔

جیلوں میں نماز عید

پنجاب کی تمام 43 جیلوں میں عیدالاضحیٰ کی نماز بھی ادا کی گئی، آئی جی جیل خانہ جات میاں فاروق نذیر اور ڈی آئی جیز سمیت تمام سپریٹینڈنٹس پولیس نے اسیران کے ساتھ عید منائی۔

سوجی کے حلوے سے قیدیوں کی تواضح

قیدیوں کو ناشتے میں سوجی کا حلوہ، دوپہر میں چکن قورمہ اور شام کو پلاؤ دیا گیا، دوسرے روز مخیر حضرات کے تعاون سے اسیران کو کھانے میں قربانی کا گوشت فراہم کیا گیا، عزیز و اقارب کی جانب سے لائے گئے تحائف اور دیگر سامان بھی اسیران تک پہنچایا گیا۔