چیئرپرسن بینظیر انکم سپورٹ پروگرام (بی آئی ایس پی) سینیٹر روبینہ خالد نے بل اینڈ میلنڈا گیٹس فاؤنڈیشن کے شریک چیئرمین بل گیٹس سے ملاقات کی جس کے دوران امریکی مہمان نے پی آئی ایس پی کی تعریف کرتے ہوئے اسے ایک بہترین فلاحی پروگرام قرار دیا۔
مزید پڑھیں
اس موقعے پر نامور امریکی بزنس مین و فلاحی شخصیت بل گیٹس اور چیئرپرسن بی آئی ایس پی سینیٹر روبینہ خالد نے مستحق خواتین کی معاشی بااختیاری، صحت اورتکنیکی مہارت کی فراہمی کے حوالے سے مختلف اقدامات پر تبادلہ خیال کیا گیا۔
اس موقعے پر سینیٹر روبینہ خالد نے بینظیر انکم سپورٹ پروگرام کے مستحقین کو غربت سے باہر نکالنے میں فنی مہارت کی فراہمی کے اہم کردار پر زور دیتے ہوئے کہا کہ خواتین کو مجموعی طور پر بااختیار بنانے کے لیے معاشی بااختیاری ضروری ہے اور یہ ان کی آزادی اور کامیابی کی دلیل ہے۔
روبینہ خالد نے کہا کہ مستحقین کو غربت سے نکالنا ہماری اولین ترجیح ہے اور بینظیر انکم سپورٹ پروگرام اس مقصد کے حصول کے لیے مختلف منصوبوں پر کام کررہا ہے۔
انہوں نے کہا کہ زیر بحث اہم پیش رفت میں سے ایک سہ ماہی وظیفوں کی تقسیم میں شفافیت کو بڑھانے کے لیے ڈیجیٹل نظام کاآغازتھا جس کا مقصد اس بات کو یقینی بنانا ہے کہ استفادہ کنندگان اپنی ادائیگیاں فوری اور محفوظ طریقے سے حاصل کریں، اس طرح پروگرام کی مجموعی کارکردگی میں بہتری آئے گی۔
بل گیٹس نے بینظیر انکم سپورٹ پروگرام کے اقدامات اور کارکردگی کو سراہتے ہوئے اسے ضرورت مندوں کے لیے ایک بہترین فلاحی پروگرام قرار دیا۔
انہوں نے اس پروگرام کے لیے اپنی مکمل حمایت کا اظہار کرتے ہوئے غذائی قلت سے نمٹنے اوپسماندہ طبقات کے لیے غذائی تحفظ میں اضافہ کرنے میں نمایاں پیش رفت کا اعتراف کیا۔
بل گیٹس نے کہا کہ میں بینظیر انکم سپورٹ پروگرام کی جانب سے غذائیت کی کمی اور غذائی تحفظ جیسے اہم مسائل سے نمٹنے میں نمایاں پیش رفت کی تعریف کرتا ہوں۔
چیئرپرسن روبینہ خالد نے بل گیٹس کا بینظیر انکم سپورٹ پروگرام کے منصوبوں میں مسلسل تعاون پر شکریہ ادا کرتے ہوئے کہا کہ ہم بل اینڈ میلنڈا گیٹس فاؤنڈیشن کے تعاون کے لیے تہہ دل سے شکر گزار ہیں جو ہمارے معاشرے کے سب سے زیادہ مستحق طبقات کو بااختیار بنانے کی ہماری کوششوں کو تقویت دیتا ہے۔
