پاکستان تحریک انصاف (پی ٹی آئی) کے اراکین قومی اسمبلی نے سیکریٹری جنرل عمر ایوب کا استعفیٰ منظور نہ کرنے کی سفارش کی ہے اور اجلاس میں متفقہ قرارداد بھی منظور کرلی۔
پی ٹی آئی اراکین قومی اسمبلی کے اجلاس میں سیکریٹری جنرل عمر ایوب کی قیادت پرمکمل اعتماد کا اظہار کیا گیا ہے۔
مزید پڑھیں
اراکین نے مطالبہ کیا ہے کہ عمر ایوب بدستور اس عہدے پر خدمات سرانجام دیتے رہیں، ان کا استعفیٰ قبول نہ کیا جائے۔
اجلاس میں تحریک انصاف میں فارورڈ بلاک کی خبروں کی بھی شدید مذمت کی گئی اور بانی پی ٹی آئی عمران خان پر مکمل اعتماد کا اظہار کیا گیا۔
پی ٹی آئی میں فارورڈ بلاک کی خبروں کی تردید
اجلاس میں منظور کی گئی قرارداد میں کہا گیا ہے کہ پاکستان تحریک انصاف میں کسی قسم کا فارورڈ بلاک بننے کی خبروں میں کوئی صداقت نہیں۔
قرارداد کے متن میں کہا گیا ہے کہ تحریک انصاف کے تمام ممبران بانی پی ٹی آئی عمران خان کی قیادت میں متحد ہیں۔
واضح رہے کہ پی ٹی آئی کے سیکریٹری جنرل عمر ایوب نے گزشتہ روز اپنے پارٹی عہدے سے استعفیٰ کا اعلان کیا تھا۔
انہوں نے کہاکہ میری عاجزانہ رائے میں مجھے لگتا ہے کہ میں سیکریٹری جنرل کے عہدے کے ساتھ انصاف نہیں کر سکتا کیونکہ مجھے قومی اسمبلی میں قائد حزب اختلاف نامزد کیا گیا ہے۔
