پاکستانی ڈراما انڈسٹری کی معروف اداکارہ یشما گل نے بابر اعظم کو پسندیدہ کرکٹر قرار دے دیا ان کا کہنا ہے کہ اُن کی اور پاکستانی کرکٹ ٹیم کے کپتان بابر اعظم کی دوستی ہو جائے تو اس میں کوئی ہرج نہیں ہے۔
حال ہی میں ایک انٹرویو کے دوران اداکارہ یشما گل کا کہنا تھا کہ بابر اعظم ان کے پسندیدہ کھلاڑی ہیں کیونکہ وہ دُنیا کے نمبر ون بیٹسمین ہیں اور انٹرنیشنل لیول پر پاکستان کی نمائندگی کررہے ہیں جوکہ پاکستان کے لیے فخر کی بات ہے۔
میزبان نے یشما گل سے سوال کیا کہ پاکستانی کرکٹرز اداکاراؤں کو سوشل میڈیا پر پیغامات بھیجتے ہیں تو کیا ان کو بھی کسی کرکٹر کا میسج آیا ہے، اداکارہ نے جواب میں کہا کہ انہیں کبھی کسی اداکارہ نے اس بارے میں نہیں بتایا کہ پاکستانی کرکٹرز انہیں میسجز بھیج رہےہیں۔
یہ بھی پڑھیں:کیا شعیب ملک اداکارہ نوال سعید کو بھی پیغامات بھیجتے رہے؟
یشما گل کا کہنا تھا کہ انہیں کبھی بھی کسی کرکٹر کی طرف سے کوئی میسج نہیں آیا۔ میزبان نے اداکارہ سے سوال کیا کہ کیا آپ کی کسی کرکٹر کے ساتھ دوستی ہے؟ جس پر یشما گل نے کہا کہ ان کی کبھی کسی کرکٹر سے کوئی ملاقات یا بات نہیں ہوئی تو پھر دوستی کیسے ہوسکتی ہے۔
اداکارہ نے اپنی بات جاری رکھتے ہوئے کہا کہ کرکٹرز کے ساتھ بھی دوستی ہوسکتی ہے، وہ ہمارے ہیرو ہیں اور ملک کی نمائندگی کررہے ہیں۔
ایک سوال کے جواب میں اداکارہ کا کہنا تھا کہ اگر ان کی بابر اعظم کے ساتھ دوستی ہوجائے تو اس میں کوئی ہرج نہیں۔
