’چیف الیکشن کمشنر اور ممبران نے تحریک انصاف کے مینڈیٹ اور عدالتی فیصلوں کو نیچا دکھانے کی کوشش کی۔ ان کے اس اقدام سے 12کروڑ سے زائد ووٹرز متاثر ہوئے‘۔ ان الزامات کیساتھ سپریم جوذیشل کونسل میں چیف الیکشن کمشنر اور ان کے ممبران کیخلاف شکایت درج کروائی گئی ہے۔
یہ بھی پڑھیں:الیکشن کمیشن کا مخصوص نشستوں سے متعلق سپریم کورٹ کے فیصلے پرعملدرآمد کرنے کا فیصلہ
چیف الیکشن کمشنر اور ممبران الیکشن کمیشن کیخلاف یہ درخواست پاکستان تحریک انصاف کے رہنما حلیم عادل شیخ، جسٹس ریٹائرڈ نورالحق قریشی اور شبیر احمد کی جانب سے مشترکہ طور پر دائر کی گئی ہے۔
اس مشترکہ شکایت میں الزام عائد کیا گیا ہے کہ چیف الیکشن کمشنر اور ارکان الیکشن کمیشن آئینی ذمہ داری ادا کرنے میں ناکام رہے۔
SJC Complaint by akkashir on Scribd
شکایت کنندگان کے مطابق چیف الیکشن کمشنر اور ممبران نے تحریک انصاف کے مینڈیٹ اور عدالتی فیصلوں کو نیچا دکھانے کی کوشش کی، ان کے اقدامات سے 12کروڑ سے زائد ووٹرز متاثر ہوئے۔
شکایت میں کہا گیا ہے کہ چیف الیکشن کمشنر اور ارکان مس کنڈکٹ کے مرتکب ہوئے ہیں۔ الیکشن کمشین نے سیاسی طور پر تعینات بیوروکریسی کو آر او اور ڈی آر او تعینات کیا۔
شکایت کنندگان نے سابق کمشنر راولپنڈی کی پریس کانفرنس کا حوالہ دیتے ہوئے کہا ہے کہ لیاقت چٹھہ نے انکشاف کیا کہ راولپنڈی کے ہر حلقہ میں ن لیگ کو 70 ہزار ووٹ ڈلوا کر جتوایا گیا۔لیاقت چٹھہ نے یہ بھی انکشاف کیا کہ چیف الیکشن کمشنر اور چیف جسٹس اس عمل میں ملوث ہیں۔
درج کروائی گئی شکایت کے مطابق الیکشن کمیشن نے پی ٹی آئی کو پہلےانتخابی نشان پھر اس کے نامزد ارکان کو پارٹی نام سے محروم کیا۔چیف الیکشن کمشنر اور ارکان کے اقدامات سے بارہ کروڑ سے زائد ووٹرز متاثر ہوئے۔
یہ بھی پڑھیں: تحریک انصاف نے 38 اراکین قومی اسمبلی کی وابستگی کے بیان حلفی الیکشن کمیشن میں جمع کرادیے
درخواست میں استدعا کی گئی ہے کہ چیف الیکشن کمشنر اور ارکان پر عائد الزامات کی انکوائری کی جائے اور انکوائری میں الزامات ثابت ہونے پر چیف الیکشن کمشنر اور ارکان کی برطرفی کی سفارش کی جائے۔
