آزاد کشمیر کے محکمہ برقیات نے رواں ماہ گھریلو اور کمرشل صارفین کو نئے ٹیرف کے مطابق بجلی کے بل جاری کر دیے ہیں۔ نئے ٹیرف کے مطابق 100 یونٹ تک بجلی استعمال کرنے والے گھریلو صارفین کو 3 روپے فی یونٹ جبکہ 100 سے 300 یونٹ تک استعمال کرنے والوں کو 5 روپے فی یونٹ کے حساب سے بل جاری کیے گئے ہیں۔
اسی طرح 300 یونٹ سے زیادہ استعمال کرنے والے صارفین کو 6 روپے فی یونٹ کے حساب سے بجلی بل جاری کیے گئے ہیں، جبکہ کمرشل صارفین کو 15 روپے فی یونٹ کے حساب سے بجلی بل جاری کیے گئے ہیں۔
اشفاق اعوان مظفرآباد کے رہائشی ہیں وی نیوز سے گفتگو کرتے ہوئے انہوں نے کہا کہ اس بار وہ بجلی کا بل دیر سے جمع کروائیں گے تاکہ وہ حکومت کو 10 روپے زیادہ دے سکیں کیوں اس ماہ ان کا بل 60 روپے آیا ہے۔ اشفاق اعوان بہت خوش ہیں کیوں کہ اس سے پہلے ان کا بل ایک ہزار سے زیادہ آتا تھا۔
مزید پڑھیں:آزادکشمیر میں بجلی کے حیران کن بل، 392 یونٹ کا بل صرف 2352 روپے
کاشف جاوید جہلم ویلی کے رہائشی ہیں وی نیوز سے گفتگو کرتے ہوئے انہوں نے کہا کہ اس بار ان کے آفس میں بجلی کا بل منفی آیا ہے اور وہ حیران ہیں۔ انہوں نے کہا کہ جب بھی بجلی کا بل آتا تھا تو وہ پریشان ہو جاتے تھے۔
انہوں نے مزید کہا کہ جموں کشمیر عوامی جوائنٹ ایکشن کمیٹی کے احتجاج کہ بعد وزیر اعظم پاکستان کے 23 ارب روپے کے پیکج کے بعد عوام کو بہت سہولت ہوئی ہے کسی کا 100 روپے بل آ رہا ہے کسی کا 200 اس سے عوام بہت خوش ہے۔ انہوں کہ کہا کہ میاں محمد نواز شریف کا شکریہ ادا کرتے ہیں جنہوں نے یہ سہولت فراہم کی ہے۔
ملک رفیق بھی مظفرآباد کے رہائشی ہیں اور اس ماہ ان کا بجلی کا بل 83 روپے آیا ہے۔ وی نیوز سے گفتگو کرتے ہوئے انہوں نے کہا کہ وہ خوشی سے بجلی کا بل جمع کروا کر آئے ہیں۔ رفیق نے کہا کہ میں اتنا خوش ہوں کہ جن لوگوں نے اس کے لیے کوشش کی میں ان کو مبارکباد پیش کرتا ہوں۔
