پاکستان تحریک انصاف (پی ٹی آئی) کے بانی عمران خان کی ہمشیرہ علیمہ خان نے کہا ہے کہ عمران خان اور بشریٰ بی بی کو غیرقانونی طور پر جیل میں رکھا گیا ہے، اب وقت آگیا ہے کہ ہم ان غیرقانونی اقدامات کے خلاف ڈٹ کر کھڑے ہوجائیں۔
اڈیالہ جیل کے باہر میڈیا سے گفتگو کرتے ہوئے انہوں نے کہاکہ عمران خان کو ڈیل کرنے پر مجبور کیا جارہا ہے مگر وہ ڈیل نہیں کریں گے، اس لیے فی الحال ان کی رہائی کا بھی کوئی امکان نہیں۔
یہ بھی پڑھیں توشہ خانہ نیا ریفرنس: عمران خان اور بشریٰ بی بی کا 8 روزہ جسمانی ریمانڈ منظور
علیمہ خان نے کہاکہ توشہ خانہ کے نئے کیس میں عمران خان اور بشریٰ بی بی کا 10 روزہ ریمانڈ دے دیا گیا جس کا مقصد ان کو مزید جیل میں رکھنا ہے۔
انہوں نے کہاکہ عمران خان اور بشریٰ بی بی کے خلاف القادر ٹرسٹ کیس چل رہا ہے، اس کے علاوہ کوئی اور کیس نہیں۔
علیمہ خان نے کہاکہ عمران خان اور ان کی اہلیہ کے ساتھ جو کچھ ہورہا ہے اس کی قانون اجازت نہیں دیتا، یہ سب کچھ شہباز شریف کی حکومت کروا رہی ہے۔
انہوں نے مزید کہاکہ جیل میں تو ان لوگوں کو ہونا چاہیے جو عمران خان کے خلاف کیسز بنوا رہے ہیں۔
