اسرائیلی میڈیا نے دعویٰ کیا ہے کہ حماس کے اعلیٰ رہنما اسماعیل ہنیہ کو ایران کے پاسداران انقلاب کے گیسٹ ہاؤس میں دوسرے ملک سے اڑائے گئے میزائل کے ذریعے نشانہ بنایا گیا، جس میں حماس کے رہنما اور ان کا محافظ شہید ہوگیا۔
اسرائیلی میڈیا کا کہنا ہے کہ حملہ اسرائیلی وقت کے مطابق رات تقریباً 2 بجے تہران کے قلب میں ایک میزائل فائرکرکے کیا گیا، اور اس مقام کو نشانہ بنایا گیا جس میں اسماعیل ہنیہ اپنے محافظ کے ساتھ موجود تھے۔
مزید پڑھیں: اسماعیل ہنیہ کے قتل کا بدلہ ایران پر فرض ہے، آیت اللہ خامنہ ای
اسرائیلی میڈیا نے یہ بھی دعویٰ کیا کہ اسماعیل ہنیہ جس عمارت میں مقیم تھے وہ ایرانی پاسداران انقلاب کے گیسٹ ہاؤس کے طور پر استعمال ہوتی ہے، جو ایران کے شمال میں واقع ہے۔
خیال رہے یہ سب دعوے اسرائیلی میڈیا کی جانب سے کیے گئے ہیں، جبکہ اسرائیلی فوج نے رد عمل دینے سے انکار کیا، اور میڈیا کے سوالوں کے جواب میں کہا کہ وہ ضروری نہیں سمجھتے میڈیا کی ہر بات کا جواب دیا جائے۔
واضح رہے اس معاملے پر اب تک اسرائیل اور امریکا کی جانب سے کوئی واضح موقف سامنے نہیں آسکا ہے، ترجمان وائٹ ہاؤس نے بھی فوری طور پر کسی بھی قسم کا تبصرہ کرنے سے گریز کیا ہے۔
یہ بھی پڑھیں: اسماعیل ہنیہ کون تھے اور اسرائیل کے لیے خوف کی علامت کیوں سمجھے جاتے تھے؟
دوسری جانب ایران کے سپریم لیڈر آیت اللہ خامنہ ای نے حماس کے سربراہ اسماعیل ہنیہ کی شہادت پر رد عمل کا اظہار کرتے ہوئے کہا ہے کہ ان کے قتل کا بدلہ لینا ایران پر فرض ہے۔
غیر ملکی میڈیا رپورٹس کے مطابق سپریم لیڈر آیت اللہ خامنہ ای نے ایک بیان میں کہا ہے کہ اسرائیل نے اپنی سخت سزا کے لیے وجوہات فراہم کردی ہیں۔
