سپریم کورٹ آف پاکستان نے چیف جسٹس کے ارکان اسمبلی کے حوالے سے ریمارکس کی وضاحت کردی ہے۔
سپریم کورٹ آف پاکستان کے ترجمان نے بتایا ہے کہ چیف جسٹس عمر عطا بندیال کے ریمارکس میڈیا پر درست انداز میں رپورٹ نہیں ہوئے کیوں کہ انہوں نے یہ کہا تھا کہ آئین ہمارے لیے اہم ہے۔
ترجمان کے مطابق چیف جسٹس عمر عطا بندیال نے کہا تھا کہ آئین ہی وفاق کو جوڑے رکھتا ہے اور یہ ہمارے لیے بہت اہم ہے کیوں کہ یہ جمہوریت کو زندہ رکھتا ہے۔
انہوں نے بتایا کہ چیف جسٹس نے کہا تھا کہ پارلیمنٹ میں جائیں تو ایسے لوگ خطاب کرتے ہوئے ملیں گے جو کل تک قید میں تھے اور غدار قرار دیے گئے تھے،اب وہ لوگ وہاں پر تقاریر کرتے ہیں اور ان کو عزت ملتی ہے کیوں کہ وہ عوام کی نمائندگی کررہے ہیں۔
