پشاور میں تنخواہوں میں 30 فیصد اضافے سمیت دیگر مطالبات کے حق میں ینگ ڈاکٹرز کا احتجاج جاری ہے، جس کے باعث سرکاری اسپتالوں کی او پی ڈیز سروسز کا بائیکاٹ کردیا گیا ہے۔
خیبر ٹیچنگ اسپتال سمیت مختلف اسپتالوں میں ینگ ڈاکٹرز نے احتجاج کیا، جس میں ڈاکٹروں کی بڑی تعداد نے شرکت کی۔
احتجاجی ڈاکٹرز کا کہنا ہے کہ حکومت ان کے مطالبات تسلیم کرنے کے بجائے انہیں نظرانداز کررہی ہے۔
ان کا کہنا تھا کہ حکومت خود لانگ مارچ میں شریک ہے، تو پھر صوبے کے ڈاکٹروں کے جائز مطالبات کیوں تسلیم نہیں کیے جا رہے؟
ینگ ڈاکٹرز نے مطالبہ کیاکہ صوبے کے ڈاکٹرز کے مطالبات پر فوری عملدرآمد کیا جائے اور تنخواہوں میں 30 فیصد اضافہ کیا جائے۔
ان کا کہنا تھا کہ مطالبات تسلیم ہونے تک احتجاج جاری رہے گا اور او پی ڈیز میں بائیکاٹ بھی برقرار رکھا جائے گا۔
دوسری جانب ینگ ڈاکٹرز کے احتجاج کے باعث سرکاری اسپتالوں میں آنے والے مریضوں کو مشکلات کا سامنا ہے، او پی ڈیز میں علاج معالجے کے لیے آنے والے مریضوں کو شدید پریشانی کا سامنا کرنا پڑ رہا ہے۔
