سینیئر سیاستدان و ممبر قومی اسمبلی شیر افضل مروت نے تحریک انصاف سے نکالے جانے کا نوٹیفکیشن مسترد کرتے ہوئے کہا ہے کہ میں جلد عمران خان سے ملاقات کرکے حقائق عوام کے سامنے لاؤں گا۔
سماجی رابطے کی سائٹ ’ایکس‘ پر اپنے ایک بیان میں شیر افضل مروت نے کہاکہ تقریباً 2 درجن کور کمیٹی ممبران سمیت پارٹی کے سینیئر رہنماؤں سے بات چیت کے بعد میں یہ اعلان کرتا ہوں کہ کل کے پارٹی سے اخراج کے حکم نامے پر نہ تو بحث ہوئی اور نہ ہی کور کمیٹی کے نوٹس میں لایا گیا اور نہ ہی یہ پارٹی چیئرمین بیرسٹر گوہر کے علم میں تھا، جنہوں نے اجلاس کی صدارت کی۔
اہم اعلان:
تقریباً دو درجن کور کمیٹی ممبران سمیت پارٹی کے سینئر رہنماؤں سے بات چیت کے بعد میں یہ اعلان کرتا ہوں کہ کل کے پارٹی سے اخراج کے حکم نامے پر نہ تو بحث ہوئی اور نہ ہی کور کمیٹی کے نوٹس میں لایا گیا اور نہ ہی یہ پارٹی چیئرمین بیرسٹر گوہر کے علم میں تھا۔ جنہوں نے اجلاس کی…— Sher Afzal Khan Marwat (@sherafzalmarwat) August 3, 2024
انہوں نے کہاکہ متنازعہ حکم نامے کو اس قدر مشکوک اور عجلت میں کیوں جاری کیا گیا، دھوکہ دہی سے اسے کور کمیٹی کی کارروائی کا حصہ بنا کر ایک غیر مجاز شخص کی طرف سے دکھانا صرف وہی جانتے ہیں جو اس کے معمار ہیں۔
یہ بھی پڑھیں شیر افضل مروت کی رکنیت ختم کرنے کا نوٹیفیکیشن واپس کروانے کا اعلان کس نے کیا؟
انہوں نے کہاکہ آج میں نے بیرسٹر گوہر سے تمام معاملات پر تبادلہ خیال کیا اور چیئرمین کو تحریری طور پر اپنی پارٹی اور پارلیمنٹ کی رکنیت کا فیصلہ کرنے کا مکمل اختیار دے دیا ہے اور مجھے ان پر مکمل اعتماد ہے۔
شیر افضل مروت نے کہاکہ میں اپنے حلقے کے لوگوں کا گرینڈ جرگہ بھی بلاؤں گا تاکہ ان کی رضامندی حاصل کی جاسکے کیونکہ میرے ووٹرز کی مرضی اور رضامندی میرے لیے سب سے اہم ہوگی۔
انہوں نے کہاکہ مجھے فردوس شمیم نقوی کی جانب سے نوٹیفکیشن میں استعمال کی گئی زبان پر بھی افسوس ہے، جنہوں نے طنزیہ زبان استعمال کرنے کے علاوہ پارٹی چیئرمین بیرسٹر گوہر کی منظوری کے بغیر پارلیمنٹ سے استعفیٰ دینے کا مطالبہ کیا ہے۔
ممبر قومی اسمبلی نے کہاکہ میں اس بات کی بھی تصدیق کرتا ہوں کہ مجھے نہ تو کسی نے سننے کا موقع دیا اور نہ ہی کبھی کوئی پوچھ گچھ کی گئی۔ ماضی میں بھی غلط وجوہات کی بنا پر جعلی نوٹیفکیشن جاری کیے گئے۔
واضح رہے کہ گزشتہ روز ایڈیشنل سیکریٹری جنرل پی ٹی آئی فردوس شمیم نقوی کے دستخطوں سے جاری ایک نوٹیفکیشن کے ذریعے شیر افضل مروت کو پارٹی سے نکال دیا گیا تھا۔
یہ بھی پڑھیں شیر افضل مروت کی بنیادی رکنیت معطل، ڈسپلن کی خلاف ورزی پر انکوائری کمیٹی تشکیل
اس سے قبل شیر افضل مروت کی پارٹی رکنیت معطل کی گئی تھی، جبکہ عمران خان بھی ان سے ملنے سے انکار کرچکے ہیں۔
