اپنے خاندان سے جدا شہریوں کو اپنے پیاروں سے ملانے کے لیے پنجاب پولیس کی پبلک ایپلیکیشن ’میرا پیارا‘ تیاری کے مراحل میں ہے جسے نگران وزیراعلیٰ پنجاب محسن نقوی نے جلد فعال کرنے کی ہدایت کی ہے۔
پنجاب پولیس کی اس ایپ ’میرا پیارا‘ ایپ کے ذریعہ گمشدہ بچوں، بزرگوں، مریضوں کو ورثا سے ملانے کے لیے استعمال کیا جائے گا۔
اس ڈیجیٹل ایپ میں گمشدہ بچے اور افراد، ان کے لواحقین کا بائیو ڈیٹا، تصویر، فنگر پرنٹ، شناختی کارڈ اور ب فارم کی تفصیلات ہوں گی۔
گمشدہ بچوں، افراد اور ان کے لواحقین کے ڈی این اے ٹیسٹ بھی کرائے جائیں گے جبکہ نگران وزیر اعلی پنجاب محسن نقوی کی ہدایت پر پنجاب بھر کے تھانوں میں گمشدگی کی رپورٹس کا ڈیٹا تیار کیا جائے گا۔
یتیم خانوں، دارالامان اوردیگر اداروں میں مقیم بچوں اور بالغ افراد کا ڈیٹا بھی ’میرا پیارا‘ ایپ پر لوڈ ہو گا۔
شہری اپنے موبائل فون، فرنٹ ڈیسک، تحفظ مرکز اورخدمت مرکز کے ذریعے گمشدگی کی رپورٹ ’میرا پیارا‘ پر اپ لوڈ کرسکیں گے۔
ایک اہم اجلاس کی صدارت کے دوران نگران وزیر اعلی پنجاب محسن نقوی نے گوجرانوالہ کے 6 سال سے گمشدہ بچے کو ورثا سے ملانے پر سی ٹی او لاہور کی کاوشوں کی تعریف کی۔
گوجرانوالہ کے گمشدہ اسپیشل بچے کی تلاش میں اس کا باپ فوت ہوگیا تھا جب کہ ماں دربدر پھرتی رہی۔ اسپیشل بچہ 6 سال سے گوجرانوالہ چائلڈ پروٹیکشن بیورو میں اپنے پیاروں کی راہ تک رہا تھا۔
